美國聯儲局對息口愈來愈鴿，環球股市就愈升愈有！周四凌晨聯儲局維持利率不變，且明確改變加息路徑，又話將更早完成縮表，令資金除咗憧憬上半年唔加息外，仲可以博埋當經濟轉差時隨時減息，咁股市又點會唔開香檳慶祝先。
港股在無北水支持下，成交依然未見大縮，昨日主板成交增至1,131億元，真係唔講以為係大旺市。恒指初段一度衝破兩萬八關，高見28,010點，最終升299點報27,942點，距250天線28,464點僅522點；國指則升138點報11,035點，市底似有轉強之勢。
藍籌股昨日重現活力，而早前表現落後或估值較吸引的藍籌有從後趕上迹象，好似友邦保險（01299）升2.3%，上破70元關，建設銀行（00939）升1%，中國平安保險（02318）升2.6%，升勢確實幾全面。
講番今轉港股炒上，主要都係憧憬加息周期完結，故受惠美元轉弱以及息口敏感股，今轉的炒作時間可能較長。其實本地地產股近日已偷步炒上，昨日仍保持不俗動力，恒基地產（00012）、新鴻基地產（00016）、新世界發展（00017）及長實集團（01113）等四大地產股升勢持續。
仲有係，一旦中美談判傾唔成，貿易戰焗住要繼續打落去，令市場轉炒美國「減息」的話，即使其他板塊跟隨大市下跌，地產股藉着息口因素，有一定抗跌力。雖然家陣先嚟買係就係遲咗，惟只要定好跌穿20天線就止蝕，風險有數得計。
另外，美元轉弱應有利商品市場，一眾資源股都有機會炒番轉，好似中國鋁業（02600）、江西銅業（00358）、鞍鋼股份（00347）及馬鋼（00323）等昨日全線做好。既然板塊有勢起動，不妨先放入觀察名單內，再伺機跟進。
古勝