Market Insight：短線選股穩陣為先

蘋果公司公布一九財年第一季度業績，整體表現不過不失，惟行政總裁庫克表示，擔心大中華區銷售轉弱較預期更嚴重。昨日手機設備股普遍腳仔軟，人氣最旺的瑞聲科技（02018）及舜宇光學（02382）分別跌2%及1.5%，但仍守穩短期升軌支持。

手機股宜炒不宜揸

至於古勝昨日提及，藉着5G天線振子研發而炒起的通達集團（00698）就回吐6.4%，其他如高偉電子（01415）、丘鈦科技（01478）及比亞迪電子（00285）跌幅則介乎0.6至4.4%。

從目前形勢睇，華為事件發展至今，反映中美兩國衝突持續的機會唔細外，亦令市場更加深信，美國要打壓中國高科技產業發展係絕對唔會手軟。

與此同時，內地智能手機市場經歷多年高速增長後，已明顯有飽和迹象，即使今年初市場熱炒對5G概念的憧憬，但要企業真正獲得收成，仍有漫漫長路。故此，手機設備股經歷一輪急彈後，仲有幾大值博率，其實真係唔太樂觀，手機設備股隨時又變雞肋，宜炒不宜揸。

另外，在下早前話中國人壽（02628）出名難炒都炒得上，內險股似有轉勢迹象，惟希望愈大、隨時失望愈大，事關國壽周二收市後發盈警，預計去年度純利將按年大跌五至七成，遜市場預期，純利大跌主因是市場整體震盪下行，令投資收益大減所致。

受消息拖累，國壽股價昨日跌1.8%報18.9元，睇怕20元關唔係咁易衝破。策略上，喺股價未破位前都可以放埋一邊先。其他內險股亦個別發展，中國平安保險（02318）昨升0.6%，中國財險（02328）跌0.6%，中國太保（02601）跌1.6%，睇落氣氛唔算太差，早前建議逢低吸納內險股之策略依然可行。

防守類股逢低可吸

當然，如果要穩陣，都係搵番一批受惠人民幣貶值預期下降，或業務相對穩陣的板塊。公用股當然唔使多講，好似中電控股（00002）、中華煤氣（00003）、港鐵公司（00066）以及港燈（02638），近幾個月股價表現普遍唔錯。

另外，一眾房託基金近期亦跑贏大市，好似置富產業信託（00778）、越秀房產信託（00405）同領展（00823）等近幾個月可謂悶聲發大財，三者現價股息率介乎至2.9至6.1厘，唔想咁煩揀來揀去，不妨從中吼隻心水股逢低吸納。

古勝