臨近農曆新年，內地各大科網企業應該已經陸續派發花紅（內地慣稱年終獎）。往年豪派花紅，除咗要展現亮麗業績外，亦係為咗公關同埋招聘等理由。但係今年，大多數科網企業嘅打工仔卻齊齊大嗌花紅無咗，又或者點解少咗咁多嘅？
內地在線招聘網站智聯招聘發布一項針對2萬名白領嘅「2018白領年終獎調查」，話去年可以拿到花紅嘅白領不足六成，全國白領花紅總體平均值係7,100元（人民幣‧下同），較一七年下跌2.4%。以行業分類，互聯網行業白領可以攞到花紅嘅比例，喺13個排名行業中墊底，僅有46.49%科網白領話有花紅。
睇番舊年，有啲新進科企，好似滴滴出行，由於業績麻麻，宣布普通員工年終花紅減半，高管更加無花紅。另一家明星科企ofo小黃車情況更加嚴峻，公司資金緊絀，今年已十居其九無花紅派喇！去年嚟港上市嘅美團點評（03690）早前就有員工爆料，話公司取消年終花紅，改為發放新年禮包，但員工要自己用錢購買，仲未有交代係咪有折添。
不過，有一則好消息喺市場流傳，就係騰訊控股（00700）旗下微信某個部門獲發年終花紅20億元，相當於人均280萬元。微信年會陽光普照獎就每人發咗一部頂配版嘅iPhone XS Max，不單止有2,888元大利是，今年仲提早四個月加薪添！但係傳聞一出，騰訊嘅公關總監張軍就急急闢謠，話年終花紅有增長係真，但人均280萬就無可能嘞！點都好啦，送iPhone加埋大利是都已經恨死隔籬啦！
余絲韻