Market Insight：淡風續吹 港股憂彈散

先睇美國停擺，真係唔講唔知，美墨邊境圍牆可能對美國總統「侵侵」真係好重要，如果唔係聯邦政府都唔使因而破紀錄停擺。市場就預期「侵侵」隨時頒布緊急狀態令，究竟最終如何發展，相信就連投佢票的選民都估唔到，更何況在太西洋另一邊的中港投資者？

負面消息不斷困擾

其次，近幾年金融市場經歷多次黑天鵝事件後，相信對於再出意外都已有晒經驗，但係點都會對環球市場構成負面影響。英國國會今日就會對脫歐協議進行表決，一旦遭否決的話，英國即要面對無序脫歐，屆時唔單止英國經濟出事，就連港股都唔會有運行。

至於數據方面，中國公布十二月份出口按年增長大幅放緩至0.2%，遠遜預期的增長6.6%，十二月進口更按年轉跌3.1%。好明顯橫睇豎睇都係衰，港股昨日都只不過跌三百幾點，其實淡友已算好克制。

講到咁衰，又係咪真係無得彈呢？正如之前古勝所指，港股經歷早前的反彈後，恒指市盈率已經自10.5倍彈到約11.1倍。雖然從中長線角度睇，與近幾五年歷史市盈率平均約11.7倍水平已經差唔多。

不過，更值得留意的是，現時港股跌市，除受到中美貿易戰、人民幣貶值、英國脫歐及環球股市調整拖累外，仲包括埋被市場忽略的環球央行齊齊收水之因素，事關投資市場從往日的資金氾濫到今日「水緊」，其負面影響不容忽視，故大家應該花啲時間研究一下！

回看港股，市場氣氛似再轉淡，早前被國策玩殘的汽車股及醫藥股，上周彈完一輪後昨日已「無戲唱」，前者受累國家隨時被迫進一步開放市場，變相引入更多外國競爭對手；後者則受累藥品降價政策，兩者基本面依然未見改善。

地產股候調整吸納

股民好自然會用腳投票，比亞迪（01211）昨日跌6.6%，吉利汽車（00175）跌3%，長城汽車（02333）跌2.4%；石藥集團（01093）跌3.1%，中國生物製藥（01177）跌1.6%，相信家陣唔係個個夠膽衝入去。

反而本地地產股雖受整體經濟增長放緩影響，但另方面卻受惠加息步伐減慢，加上最近部分業主接受現實肯減價，二手樓市開始見承接力，有利樓市氣氛。長實集團（01113）、新鴻基地產（00016）、恒基地產（00012）及新世界（00017）早前急升過一輪，近日開始見整固，反而是中線投資機會，值得從中揀隻心水股，候落番去20天線附近翻兜，跌穿50天線止蝕。

古勝