董明珠能否連任格力電器董事長？相信很快將會有眉目。事關日前格力電器公告稱，公司將喺本月十六日召開股東大會進行董事會換屆選舉，董明珠被提名為董事候選人，而佢嘅閨密劉姝威就被推薦為獨董候選人。
話說珠姐舊年五月三十一日任期屆滿後，理應退任董事長，但公司喺六月四日發公告話，換屆選舉將適當延期，結果就推到今個月中先表決。咪以為今年64歲嘅珠姐想退休，佢話過：「雖然已經60多歲，但我的心還是像25歲一樣！」
至於佢位閨密劉姝威，今年都已經66歲，現任職中央財經大學中國企業研究中心主任。佢曾經被內媒評為中國三個最唔好惹嘅女人之一，另外兩位就係董明珠同來自媒體界別嘅胡舒立。
講番格力先，有業內人士指出，如果珠姐能夠喺月中嘅股東大會上順利當選董事，咁之後喺董事會上當選董事長，基本係十拿九穩！按照格力董事會嘅人數係四位董事加兩位獨董，如果劉姝威能夠當選獨董，有埋佢呢票，珠姐當選董事長就更加穩陣！
余絲韻