絲絲講場：瑞聲股價超殘搵猛人挽狂瀾
俗語話「送舊迎新」，新一年梗係想有個新開始！不過，瑞聲科技（02018）喺一九年首個交易日表現認真麻麻，股價收報43.4元，跌咗4.5%，又創超過三年新低。講番一八年，瑞聲全年股價累跌逾67%，「榮登」表現最差藍籌，今年為咗力挽狂瀾，就請咗兩位猛人助陣！
彭志遠曾任外資行高層
瑞聲尋日宣布，委任彭志遠及張宏江為獨立非執行董事，即日起生效。據通告介紹，兩個人份CV都好「勁抽」，除咗係科技領域嘅專家外，仲擁有資深嘅企業融資及管理背景。第一位係彭志遠，佢曾喺兩大外資投行高盛及摩根士丹利做高層，依家喺Sands Capital Management做全球策略官，雖然佢今年46歲，但企業融資及管理方面嘅經驗已超過20年。
張宏江幫過雷軍打天下
另一位就係曾擔任微軟亞太研發集團首席技術官嘅張宏江，佢亦幫過小米（01810）創辦人雷軍打過天下，曾喺雷總旗下金山軟件（03888）擔任首席執行官和執行董事。依家就身兼多職，分別係北京源碼資本嘅投資合夥人、紅爆內地嘅抖音同埋今日頭條母企字節跳動科技嘅顧問、舊年喺香港上市嘅寶寶樹（01761）獨立非執行董事，同埋神州數碼（000034.SZ）獨立董事等等。
兩位猛人份CV雖然超「靚仔」，但每年董事袍金都係得6萬美元（約46.8萬港元），計番每個月人工都係3.9萬元咋！老實講，瑞聲淨係舊年市值都唔見咗逾千億元，今次請兩位猛人助陣都算係物超所值啦啩。
余絲韻