美股在Boxing Day強勁反彈，道指急升逾千點，創史上最大單日上升點數。不過，別忘記這是美股連日大跌之後所作出的技術性反彈而已，在技術修正過後，美股將如何走向，乃後市關鍵，若短線資金流出的趨勢未改，美股只會彈完再散！
古勝認為，對住如今的美股，無論大、小戶都會覺冇癮，一來就連龍頭美國企業如蘋果公司的盈利增長都開始放慢，貿易戰對美企的盈利損害正逐步反映出來，且稅務改革的刺激亦在減退；二來美國持續加息對企業和個人的財務影響逐步浮現，加上縮表收緊市場流動性，對來年企業投資亦會有一定的影響。橫睇豎睇，現美股的估值，論風險與回報，欠吸引力。
好了，若然資金持續走出美國，點都要搵個落腳點，也許新興市場可一定程度受惠。當然，年關當前，挑戰尤在，市場仍等候二月中美貿易談判的結果。觀乎如今美國金融市場好景不常，照計可以增加雙方達成協議的機會，若然真的有好消息，環球股市表現春回大地的可能性不能完全抹殺。
個股消息方面，內地傳媒指中石化（00386）同系公司有兩名高管疑因炒油炒燶招致巨額交易虧損而遭停職，消息拖累其A、H股價齊齊下跌。老實講，大大小小國資背景企業或國有企業存在各種管治問題，時有所聞，但即使爆大鑊，最終呢啲企業都有阿爺包底，萬大事都可以「化解」！
睇番中石化，其實同系公司高層行為出問題唔係冇前科，至於今次出事，何解涉及的交易權限沒有適當監控，亦沒有執行止蝕紀律，且看相關企業正式公布如何解畫。受到同系利淡消息影響，中石化短期股價受壓，但該不影響長線業務發展。若然睇好能源板塊，短期波動或可帶來操作機會。
古勝