美國聯儲局一如預期宣布加息0.25厘，但另一邊廂，人民銀行就設置定向中期借貸便利（TMLF），市場理解為間接定向減息。中美兩國貨幣政策背道而馳，多少反映兩地對經濟前景的睇法不同。
最直接受息率前景影響的當然係匯價，昨日在岸人民幣（CNY）就一度見過6.91水平。照咁睇，市場都係押注人仔中線重拾貶值方向居多。
港股可謂兩面受敵，一方面聯儲局加息，但就未有進一步放鴿，令市場擔心企業及經濟能否承受高息及環球央行齊齊收水的大環境；另一方面，人行突然寬鬆，是否預示內地經濟問題嚴峻？
負面投資氣氛影響下，藍籌股自然無運行，昨日權重股騰訊（00700）雖然跌0.4%唔算多，但最慘係港股整體跌勢全面，藍籌中只有10隻持平或微升，當中3隻係公用股，避險心態明顯。
美國息口再上，香港銀行即使暫時唔跟，但未來追加壓力日增，試問對息口敏感的本地地產股又點會彈得起？仲未計環球經濟前景轉差，以及本地住宅供應持續增加的不利因素。近排香港樓市已呈見頂回落，二手劈價盤不斷湧現，所以板塊未來前景都幾悲。
睇番昨日除咗新鴻基地產（00016）只跌0.6%外，恒基地產（00012）、新世界（00017）及長實集團（01113）跌幅介乎2.2至2.8%，好明顯投資者已紛紛用腳投票。
雖然市場憧憬中央經濟工作會議後，將發放一九年的全方位刺激經濟政策。不過，由於長假臨近、期指結算在即以及餘下交易日唔多，睇怕市場上選擇「鳴金收兵，明年再戰」的投資者會愈來愈多。
既然臨近年尾收爐，整體大市又偏淡，實在無必要太進取，最多建議看官選擇公用股如中電（00002）、中華煤氣（00003）及電能（00006），再唔係揀隻中移（00941）避吓險就算。當然，揸現金仲係最穩陣的做法！
古勝