小米（01810）董事長雷軍上個星期日啱啱過咗49歲生日，仲收到兩份超級特別嘅生日禮物，分別係一架電動汽車，同埋一個誠心嘅道歉！
雷總上個星期六夜晚，就為上海蔚來汽車嘅新款電動汽車ES6發布會站台，坦言開初覺得互聯網造車係騙子，但當蔚來老闆李斌搵自己買車先改變呢個諗法。佢仲話，李斌係眾多互聯網車企入面，最識得汽車嘅一個，加上佩服佢嘅勇氣，所以決定支持。而喺發布會上，李斌宣布已經交付近萬部ES8，而當天更將其中一部交畀雷總添。
雷軍其後亦喺微博透露李斌另外贈送一架ES6畀佢，即係買一送一？但雷總就話：「李斌送的這輛ES6，雖然很想留着自己開，想了想，還是轉送給米粉吧！」
至於另一份禮物，就係聯想集團（00992）副總裁常程透過微博同雷總祝賀兼道歉，仲講到明「多有得罪，生日快樂」。話說近日聯想為咗宣傳新手機Z5s，喺官方發布四張海報，每張都掛出小米8，並宣稱Z5s喺各個方面都完勝小米8。雖然此舉令聯想大收宣傳效果，但就搞到小米管理團隊超冇癮囉。
余絲韻