絲絲講場：十億賭局 格力珠姐：我贏了
仲記得小米集團（01810）創始人雷軍同格力電器（000651.SZ）董事長董明珠有一個「十億賭局」嗎？雖未到年尾正式揭盅，但珠姐已率先同大家講，佢基本上已經贏咗！
回帶返去五年前內地一個電視台頒獎典禮上，雷軍向同為獲獎者嘅珠姐挑機話，小米營業額五年內必超格力。雷軍講笑話如果佢贏，希望珠姐賠一蚊人仔畀佢。珠姐當然唔示弱，仲大番雷軍轉頭話，如果真係願意賠10億元（人民幣‧下同）！咦，依家睇番，當年好似無講過珠姐贏咗會有錢收喎。
珠姐喺剛剛周日一個公開場合度同記者講，話今年格力營收增長500億元。咁大家幫佢計數，一七年格力營收達1,482.86億元，即今年營收將達2,000億元左右。
「小米生意唔同 無得比」
睇番今年首三季數據，格力首三季營收約1,487億元，小米同期營收約1,305億元。即係話小米要喺第四季做700億元生意先贏到，睇嚟窄窄哋，除非小米物聯網業務喺第四季真係點石成金啦。
不過珠姐今時補番句話，同雷軍嘅賭局本身無乜意義，因為兩者「不具備可比性」，格力做實體經濟，而小米做互聯網生意，屬於輕資產咁話。計絲絲話，嗱咁咪大家好落台囉，珠姐真有一手！
余絲韻