孖妹S檔案：半新股粉絲 數盡心中之最

張：炒股達人 張匯川

Jackie：散戶 Jackie

余：余礎安會計師事務所董事總經理 余礎安（Roger）

聶：富途證券分析員 聶振邦

最眼冤：海底撈四大原因撈唔過

Kitty：正所謂唔熟唔食，有冇啲半新股係我識（口架）？

彩兒：你淨係識食飯同瞓覺，好難同你啱Channel。

余：今年有三隻平民化新股上市，但估計表現麻麻！海底撈（06862）唔好撈！因我覺得佢會陰啲陰啲跌穿10元。雖然佢係內地著名連鎖火鍋店，但有幾個不利因素。

第一，估值貴；第二，成本貴，餐飲業有先天不足，需要多地方同多員工，而佢哋喺香港租舖就要捱貴租，加上兩地人工都唔平，所以百上加斤；第三，客人忠誠度低，打邊爐唔係家常便飯，唔可以餐餐食，而客人幫襯火鍋店，通常鍾意去新舖頭，試新湯底及新材料；第四，開火鍋店入場門檻低，易有競爭對手，要搶佔更多市場份額一啲都唔易。

Jackie：同意，海底撈進軍香港，要捱貴租之餘，打邊爐翻桌率亦慢，所以盈利能力低。

余：另外，唔少人睇好歐化（01711），但其實佢嘅品牌唔夠潮，其產品市場亦太細，主要銷售中高檔歐洲進口傢俬，要針對中高端客戶群做宣傳有一定難度。

再者，同行線上線下競爭激烈，有大眾化嘅老傢俬品牌不斷變革，塑造時尚形象。歐化上半年收入按年減少，同時銷售及分銷開支增加，所以蝕多咗。

彩兒：歐化目前股價較招股價跌逾四成。

精英匯難拓幼兒教育

余：相信你哋都係好學寶寶，認識經營香港補習社「遵理」嘅精英匯集團（01775），但佢都麻麻。雖然佢係中學補習社龍頭，但呢個市場已飽和，而公司收入過分依賴中學補習，故料業務增長有限。

再者，會考及高考合併成文憑試多年，香港出生率亦持續下跌，同時外國升學普及，補習人數料大幅減少。截至一八年七月底止全年業績，收入按年增加，但導師服務費亦大增，所以最終都賺少咗。

余：若公司拓展至幼兒教育，可能有轉機，但目前困難重重。因幼兒教育中心要有地理優勢，家長一般會搵間就腳嘅中心，容易接送子女上學放學。另外，幼兒家長會想老師貼心跟進孩子嘅學業同成長，所以遵理大班教學及名師吸客嘅方法唔適用。

會計師余礎安估計，海底撈股價會跌穿10元。	散戶Jackie看好有明星效應的股份，例如閱文及同程藝龍。	炒股達人張匯川看淡半新股表現，並預計恒指不會升穿二萬八千點。

最值博：奧邦及澳獅具反彈信號

Kitty：公司條件好，梗係多人追。

聶：未必。倘管理層知道公司掂，上市定價都會高，投資風險就大咗。例如寶寶樹集團（01761）上市前獲三批融資，融資成本價分別逾3元、4元及11元，而招股價則為6.8元，屬偏貴。一旦公司上市後無咩新業務增長點，股價就難炒上。

Kitty：點搵最值博半新股？年內升得最多嘅係ISP GLOBAL（08487）；跌得最多嘅係匯安智能（08379）。

彩兒：Let bygones be bygones.（過去嘅就由佢過去。）

聶：睇幅度，不如睇技術走勢。例如奧邦建築（01615）及澳獅環球（01540），兩個走勢圖都出現弧形底，股價可望反彈。咁啱佢哋亦係毫子股，而毫子股表現通常好啲，我亦睇好富匯建築控股（01034），股價上市至今升約1.5倍。另外，計埋每股合理值，若其高過招股價，都係值博嘅Signal。

彩兒：揀半新股，有冇關佢做咩業務事？

Jackie：我覺得做實業嘅最實淨，例如天仁茗茶香港經銷商賓仕國際（01705），佢哋人流多，賺到錢。盈利能力弱嘅公司就唔睇好，佢哋全靠不斷融資，市值先符合上市條件。除非係好Hit，例如雷蛇（01337），我都有抽，仲即日食胡賺幾百元。另外我睇好有明星效應嘅公司，例如騰訊概念股閱文集團（00772）及同程藝龍。

彩兒：Roger，你最叻睇公司年報，有冇邊間公司得你歡心？

碧桂園服務食正需求

余：碧桂園服務（06098）！睇番一八年上半年業績，收入按年升逾四成，期內利潤及綜合收益總額都升超過一倍。因過去呢一兩年內房銷售強勁，碧桂園亦然，而後續物管服務需求殷切，公司係內房龍頭，自己起好物業，可攞番物業管理嚟做。另外，唔係間間地產發展商旗下都有物業管理公司，所以佢哋唔排除會畀埋碧桂園做管理。其服務都幾全面，包括保安、開荒清潔及維修保養等；物業管理組合亦涵蓋寫字樓、醫院、公園及學校等。

Kitty：內地醫藥界第一隻獨角獸藥明康德（02359）快上市，唔知到時會否超額認購、股價爆升？

彩兒：藥明康德（603259.SH）五月喺上交所上市後，連續16日漲停，曾累升逾5倍。但目前A股股價同港股招股價上限都接近，如果博喺香港上市後狂升，我冇咩把握。

最無望：受累二手市 普遍難復返

張：我估計今年好多半新股都一去不復返，因連二手市場股價都低殘，仲邊有人炒新股，莊家超難散貨。例如同程藝龍，其買賣盤唔多。唉！後悔點解喺新股狂熱時，唔買多啲。

彩兒：個別情況咋？希瑪眼科（03309）上市至今升近一倍；賓仕國際首日上市升近三倍。

抽新股前分析三因素

張：升過一下，莊家成功喺高位散貨，就唔再炒喇。如果仲揸住，真係有排做蟹民。同一七年比較，真係好大分別。上年尾都話有閱文及眾安在綫（06060），佢哋升跌盤路都明顯，所以多散戶追捧，一日可賺逾十萬元。嗰時股價不斷升，散戶都冇有怕不斷追，莊家亦唔介意推高價，所以掃上去好順。

Kitty：唔炒半新股，抽新股又如何？

張：第一，睇有冇明星效應。若相關報道鋪天蓋地，個個散戶抽，股份爛船都有三根釘。若報道係零，公司上市冇人知，股價都好難升；第二，睇基本面。例如美團點評（03690）市值高，但業績蝕800幾億元人民幣，散戶都卻步；第三，睇港股成交額。二手市場炒旺完，先會順帶新股炒上。近日港股成交額1,000億元唔夠，舊股都無人問津，更何況新股？

Kitty：明年都係無望？

張：我覺得港股，包括半新股都有排衰！十一月似乎升番少少，但都只係技術性反彈，我估恒指唔會升穿28,000點。料其後仲會陷入大跌市。今次股災唔好睇小，係罕有股樓齊冧，投資者要小心。我無揸半新股，亦唔打算炒住。

Kitty、彩兒