Market Insight：鎖定目標 吼位短炒

投資市場氣氛短期將有一段時間稍為緩和，但能唔能夠愈升愈有，咁就真係好難講，因為到最後都要睇市場如何演釋相關消息。

G20峰會及中美元首會面有關貿戰詳情就唔多講，事關詳情可睇番新聞版，反而關注資金點樣用真金白銀押注最實際。上周尾段中美元首會面未進行前，港股向上動力已見減弱，恒指上周五僅升55點，收報26,506點，國指則升36點報10,621點，主板成交增至1,040億元。

恒指末季有機翻身

內地方面，滬綜指升20點報2,588點，睇落都有部分較勇資金押注睇好。至於美股周五晚亦「未卜先知」升定先，三大指數皆向上，道指升199點報25,538點，連近期最弱的納指都升57點報7,330點。

睇番港股近月走勢其實都有改善，若以整個十一月計，恒指全月累漲1,527點或6.1%，結束連跌六個月之頹勢；國指則累漲483點或4.7%。從月線圖觀察，恒指十一月呈現近幾個月少見之陽燭，只要十二月能夠再彈多1,300點左右，則恒指第四季將扭轉前兩季之下跌勢頭，中線走勢進一步轉強。

上周四及五市場觀望氣氛確係濃，尤其於G20峰會前多隻等候「審判」的出口股，又或美國業務佔比較重的個股走勢皆偏弱，利豐（00494）、敏華控股（01999）、萬洲國際（00288）及創科實業（00669）分別逆市跌0.5至2.4%不等。咁又難怪，相關板塊未來前景真係好睇中美傾成點，在風險面前先避其鋒好正常。

不過，如今「休戰牌」出場，之前跌得最多，插得最深的個股及板塊反而最有留意價值。除上述股份，早前受影響的航運及港口、科技及汽車股全部都值得納入觀察名單。反之，早前市場炒中央或力谷內需股，以應對中美貿戰，奈何板塊表現參差，亦唔算炒得起，在如今情況下相信就更難炒上。

權重股係入市首選

部署上，如果未有買貨心水選擇，又或者懶得去分析，咁正如古勝早前提過，直接買主要權重股就最慳水慳力。皆因市場氣氛好轉，指數要向上，權重股必然有運行。騰訊控股（00700）作為今轉帶動港股反彈的主要火車頭，後市彈力有機會優於市場預期，仍可逢低吸納。

另外，金融股如建設銀行（00939）、滙豐控股（00005）及友邦（01299）等股價近期走勢好轉，普遍已經或快將破位而上，短線順勢跟進，博行一轉反彈浪亦不失為簡單策略之一。當然，若市場風向突轉，先定股價穿20天線止蝕，當買個保險，咁落場就安心得多啦！

古勝