絲絲講場：拼少少神奇登場 激鬥拼多多

「張勇」創辦 狂註冊商標

近日有內媒發現，一個名為「拼少少」嘅電商平台對外宣布即將上線，佢唔單止同拼多多一樣定位社交電商，甚至連個名同商標都勁似，惹起「山寨」疑雲。最令人啼笑皆非嘅係，呢間拼少少有位持股四成嘅創始股東張勇，個名同阿里巴巴候任主席及CEO一樣，唔通張勇有份入股？

經內媒明查暗訪，發現拼少少喺品牌保護方面，真是滴水不漏！首先，作為拼少少背後母公司深圳虹新零售企業管理公司大量申請品牌商標，總共提交咗12個「拼少少」相關商標，類別涵蓋日用品、電腦軟件、廣告等眾多領域。而該公司近日再申請咗名為「拼少少放心購」商標，相信係為拼少少上線做好準備。其次，拼少少官網剛剛正式上線，並且佢哋Logo同吉祥物亦準備齊全。

最後，拼少少官網介紹，平台商品主要係老字號為主，合作品牌有5家，分別為韓後、黃金搭檔、紅旗轎車、賀賀文化和紫砂傳說。此外，拼少少明言主打年輕一代用戶，話呢啲用戶追求品質差異化喎。

余絲韻