絲絲講場：雷軍示範AI助手 臨場甩轆瘀爆

設備要多5年先成熟

點知小愛同學似乎有啲怯場，唔多聽話。雷總首先問「三個馬字（驫）點讀？」小愛同學好快答啱，但到第二題「三個木（森）呢？」小愛竟然聽錯係「入木三分」， 之後仲唱埋歌，激到雷總話「是不是每次到演示的時候你都出錯？」

再畀多次機會，雷軍又問「125＋357＋567等於多少？」，今次小愛直情口啞啞。不過，都唔怪得小愛，只有兩歲嘅佢年紀還細，連雷軍都預計要多3至5年時間日常家居設備應用人工智能先會較成熟。

之不過，小愛同學其實都好幫得手，原來佢累計激活設備數量約1億台，每日透過佢把靚聲叫醒用戶次數累計超過80億，而小愛同學服務嘅月活躍用戶人數超過3,400萬。

外國市場調查公司Strategy Analytics最新報告預測，今年全球銷售嘅智能手機將有大約一半配備AI語音助手，去年呢個數字為36.6%。該公司並預測明年全球超過一半智能手機將擁有AI語音助手，二○二三年更加增長到90%。

余絲韻