Market Insight：期待爆上 買權重股

睇番港股近期都係圍住兩個焦點：「習特會」及憧憬聯儲局暫停加息。前者就真係無得估，尤其是美國總統「侵侵」喜怒無常，一時同你搭膊頭，轉個頭隨時反枱都唔定，都真係好難捉摸。

至於息口走向，市場炒聯儲局減速加息炒到出煙。咁又難怪，「侵侵」出到聲要油價跌，油價即冧幾成，環球經濟增長又隨時減慢，增加聯儲局放慢加息步伐，甚至停止加息的籌碼。

地產股追貨有保留

對息口敏感的本地地產股，即時有反應，新鴻基地產（00016）、恒基地產（00012）、新世界發展（00017）同長實集團（01113）股價昨日升幅介乎2至3.7%不等。

值得留意的是，雖然話美國暫停加息的憧憬有利地產板塊前景，但部分投資者認為，地產發展商近幾年為準業主安排的發展商高成數按揭甚至極低息發展期按揭（即收樓頭幾年以低息貸款，之後才逐步轉番正常甚至稍高的按揭息口）。

最慘係近期樓市氣氛轉差之外，明年亦是這批因發展商鼓勵炒家或稍欠實力買家入市的「到期年」。

若然到時轉番正常息口後，有部分業主搵唔到銀行做二按，要捱貴息之餘隨時又要面對經濟下滑風險，咁計落條數，會唔會因為咁而出現大批銀主盤，令近期新盤主導樓市的主軸進一步受打擊，港樓「再下一城」？此機會確實不能抹殺。所以今轉與樓價方向背馳的本地地產股反彈，會唔會係最後逃生門？大家真係要三思而後行。

港股反彈，作為權重股的騰訊（00700）、滙豐控股（00005）及友邦保險（01299）分別升1至2.3%不等，難得的是中國移動（00941）同中資金融股都齊齊發力，四大內銀中國銀行（03988）升1.4%、工商銀行（01398）升1.8%、建設銀行（00939）升1.8%及農業銀行（01288）升2%。

滙控工行走勢不俗

如果有睇開本欄的讀者應該記得，古勝早前講過如果港股要再上一層樓，除要靠騰訊及內銀等權重股推動外，國際及中資金融股都必須齊齊發力方可。昨日的升市確實做到呢點，唯一美中不足的是，近期港股成交不足未能配合升勢，增加後勁不繼的風險。

部署上，既然大市有勢爆上，短期都無謂逆水行舟，所謂寧買當頭起嘛！如果現階段仍未有心水者，純以圖論勢，在權重股中則以騰訊、滙控及工行走勢較佳，三者皆已上破50天線阻力，走勢偏好，值得逢低小注試買，最多唔好彩入市後見跌，只要嚴格執行跌穿50天線止蝕，咁風險同回報其實都好易計。

古勝