鷹君集團（00041）羅氏家族大家長羅杜莉君（羅老太）告滙豐國際信託（下稱受託人），要攞返晒羅氏家族信託嘅資產一案，尋日有人喺法庭當面問羅家三子羅嘉瑞，查實佢企喺邊一邊！呢個有好多人想問嘅問題，唔係出自法官、律師或記者，開口嘅竟然係一個初中生！
話說尋日官司於高院開庭續審，有一班國際學校學生嚟旁聽，休庭嘅時候有個坐喺羅嘉瑞身後嘅洋人學生仔用英文問：「你支持邊一邊（口架） ？」羅嘉瑞惟有笑住咁用英文答咗一句：「呢個好複雜。」
單案就真係愈來愈複雜。例如以前外界一直只知，要信託三個任命人一齊簽名，就可以炒咗受託人。而受託人前高層劉倩兒（Paulina Lau）尋日作供時再講話，根據信託契約，受益人投票有60%贊成仲可以終止信託。原來羅嘉瑞加埋由佢主理嘅羅鷹石慈慧基金，再加埋羅家五子羅鷹瑞就有42.8%。咁慈慧基金係咪可以投票呢？聽尋日庭上供詞所見，似未有結論。
今次爭產風波已令羅氏家族分裂成兩派，一邊係羅老太為首嘅陣營，有孻仔羅啟瑞支持，另一邊係羅嘉瑞為首嘅陣營，反對媽媽炒受託人。唔係咁複雜啫！
余絲韻