絲絲講場：80萬Bitcoin礦工轉行 個別賣絲襪

全球第三大礦池F2pool創辦人毛世行話，反映礦池掘礦「活躍度」嘅Hash Rate今個月急跌逾一成，照咁推算的話，今個月中以來，應該都有60萬至80萬「礦工」已經輸唔起急急散水。

睇番比特幣個價，由今個月中6,000美元水平開始急跌，隨後多次下試4,300美元及3,600美元兩個低位，最低跌至3,500美元水平。根據CryptoCompare數據顯示，周一個價見喘定，晚上七時報3,968美元，叫做按日升番3.3%。

唔掘礦搞啲乜？絲絲聽講，深圳礦機銷售集中地嘅華強北商場，有部分販賣或者託管礦機嘅老闆，已經兼職賣埋鞋同絲襪，以幫補生計，都總好過望住成堆鐵食白果。

幣價暴跌難抵電費

「掘礦業」喺內地尤其進入寒冬，事關真係冬天到，天氣乾燥，「礦工」集中地區嘅水力發電成本高咗，電費跟住貴，「掘礦」耗電量高，近排比特幣價暴跌，掘埋都唔夠冚電費，再加上好多散戶「礦工」係違規用電，近排當局查得嚴，惟有散水。

不過咁，咁多人離場，剩番低嘅嗰啲，話唔埋又可以多番口飯食呢！

余絲韻