孖妹S檔案：炒股現病態點自救？

簡：精神科醫生簡重盛

周：香港心理學會臨床心理學組臨床心理學家周佩嫻

劉：中創金融科技集團首席營運官劉勝鈞

張：投資者「張大帥」

精神科醫生簡重盛表示，雖然最近股市波動，但未見有大量病人求診。

臨床心理學家周佩嫻建議，多了解自己身體反應、行為及思維。

精神科分析：財困問題成壓力源頭

Kitty：有網友話，投資盡博一鋪，再輸埋就食二手飯。有人話：「呢幾日我啲股票……連Bitcoin……輸到唔識計……個人好唔舒服……好大壓力……財困……負資產……投資失利……點解會喺呢年咁失敗……我做錯咗啲乜。」

簡：股市動盪，經常幾百點上落，投資者若無法管理好個人情緒，容易造成精神緊張，並患上焦慮症、驚恐症及抑鬱症。

彩兒：簡醫生，最近有無多咗人求診？

簡：財困問題係其中一個精神壓力嘅源頭。記得當年雷曼爆煲時，突然湧現一批新症。雖然最近股市波動，但尚未見好多人嚟求診，可能有滯後，或者大家都經歷過唔少風波，心理質素高咗。

機不離手睇市響警號

彩兒：你接觸過嘅財困人士，多數背景係點？

簡：有家庭主婦，輸晒自己嘅私己錢或買餸錢；亦有內地人，因為A股跌停板而輸錢；亦有專業投資者或金融界人士，遇上財務問題，質疑自己嘅能力，影響自我形象等。

Kitty：我無輸錢，不過心跳長期跳得好快呀！

簡：唔出奇。見過投資者就算賺到錢，仍表現出極大壓力，並患上狂躁症及抑鬱。另外，生活上嘅壞習慣都會影響到心情，例如機不離手睇住股市，狀態一直繃緊。唔少金融界從業員夜晚要睇實美股，壓力加大，會出現失眠、緊張及胃痛等情形。

Kitty：咁我嘅病徵嚴唔嚴重呢？

簡：緊張、心跳加速、抖唔到氣、手震及出汗等都屬於輕微症狀；而嚴重嘅話，就會失眠、早醒及發噩夢等。

Kitty：聽落我都放心啲。其實有咩紓緩情緒嘅方法？

紓緩方法分理性感性

簡：若股市升跌，令你心情起伏大，就要同時採用理性及感性方法處理。理性方法包括設止賺止蝕、控制投資金額，並了解個人投資風險承受能力。另外，若自己冇咩金融知識，建議上投資課程，了解股市運作。有興趣玩衍生產品如牛熊證及窩輪，特別需要熟悉其理論，若最終發現自己唔擅長運用呢類進階投資工具，就建議停手。

中創金融科技劉勝鈞稱，試過炒內銀牛熊證輸一大筆錢而嚇到暈低。

投資者「張大帥」指，若面對股市大跌卻內心驚慌，表示買股前無做好風險管理。

簡：至於感性嘅方法，包括察覺自己有問題，例如有冇周身唔舒服，成日望住市況導致過分緊張等。而紓緩緊張情緒嘅方法就包括深呼吸、肌肉鬆弛、做瑜伽、意象鬆弛及靜觀治療等。如果較為嚴重嘅，則會影響工作、人際關係及判斷力，就要食藥或尋求心理治療。

如有問題應及早求醫

彩兒：投資者仲有咩地方要注意？

簡：唔好有投機心態，要衡量自己投資風險承受能力，同時要節制，有個別投資者買少許而贏咗，之後形成心癮並一直買落去。另外，如懷疑自己有情緒問題，宜及早求醫。部分求診患者，係家人叫佢哋嚟睇醫生，本身欠主動，情緒問題因而較難解決。

Kitty：學識自救固然重要，不過希望港股會有一線生機啦。

簡：比起股市波動，我感覺樓市波動對市民精神狀況影響更大。

彩兒：聽聞近日唔少深圳樓因業主無法履行按揭供款，被法院封查後強制拍賣。若香港重演九七年後樓市爆煲，咪話唔嚇人。

心理學解構：宜修正思維 管理情緒

彩兒：心理學家點樣幫助受情緒問題困擾嘅病人？

周：香港地少人多，少地方可以做靜觀治療，所以人更容易有情緒問題。喺解決情緒問題上，臨床心理學專注個人嘅思維及行為模式，主張透過心理治療，修正思維方法，學習情緒及壓力處理等，而唔用藥物。

Kitty：朋友成日話我發錢寒、癲癲哋。

周：好多情緒問題都由財困問題衍生，例如為咗儲錢，冇得去旅行或者要打兩份工；又或者因為置業問題同家人嘈交。若居住環境狹窄，或婚後要同對方父母一齊住，都可能令自己唔開心。而情緒病係精神病其中一種。

勿讓「惡人」操控內心

彩兒：我暫時無財政問題，Yeah！

周：Good！但每個人都有情緒，所以大家要學做情緒嘅好Boss。如果任由情緒宣洩，做一個惡Boss，搞到下屬唔敢出聲，兩邊關係唔會好；相反若能讓情緒收放自如，下屬開心之餘，更隨時成為你嘅得力助手。

周：所以多啲了解自己嘅身體反應、行為及思維，並學識接納及管理情緒，都係有益。注意飲食習慣、睡眠質素及運動量，若生活習慣忽然改變，如以前食得好健康，但近排暴飲暴食，胃痛多咗、失眠，呢啲都係情緒出現問題嘅先兆。

Kitty：博士，我有無患情緒病啊？

周：我見病人時，經常會問以下幾個問題，你不妨參考吓。「第一，你有冇覺得驚慌或低落？有冇輕生意念？」如果有，就要學識收埋佢；「第二，周圍有冇人幫到你？」等佢知身邊仲有人同你傾訴解愁；「第三，以前有冇試過同樣經歷，例如克服股災？」等佢諗番以前點應對，然後勇敢面對今次嘅難關；「第四，最影響你嘅情緒係咩？」等佢學識形容自己心情，以及尋找情緒根由。

散戶輸到暈 運動減壓

周：有情緒問題唔一定係病，要衡量其嚴重程度。有啲情緒問題，只令人覺得唔舒服、唔開心，但冇影響個人日常生活。而嚴重啲嘅，則會影響日常生活。至於抑鬱症嘅病徵，包括食唔安、瞓唔落、心跳加速、做事唔起勁、煩躁緊張、情緒低落及思想負面等。但要確診抑鬱病，都要連續兩周日日都有呢啲身體反應。若一周只有三、四日出現身體毛病，咁只可以算係情緒波動。

劉：我試過炒內銀牛熊證，短時間輸三萬元。資金係死慳死抵賺番嚟嘅錢，所以當時真係嚇親，眼前一黑就暈咗。

劉：經一事，長一智，自己心理質素都高咗。我亦會做運動減壓。

周：我都見過有病人因為太緊張，唔記得呼吸節奏，所以我會教佢哋做抖氣活動。另外，多做帶氧運動，如行山及做瑜伽都可以減壓。有時約三五知己談天說地，亦可暫時拋低煩惱。

散戶教路：做齊四招 跌市冇有怕

彩兒：大帥，你喺銀行及證券界打滾多年，經歷過股壇風風雨雨。面對跌市，你有咩妙法？

跌倒受挫始能提升EQ

張：第一，若面對股市大跌卻內心驚慌，夜晚瞓唔着，表示喺進場買股前，無做好風險管理，或槓桿過高；第二，若持股十分高時意外面對股市大跌，要先研究大環境下跌嘅原因，若係短期因素，就唔使過度擔心；若係基本面轉差或反轉，則宜利用反彈減碼或清倉；第三，若覺得國際或經濟利淡等不確定性因素暫時無法排除，要長時間先明朗化，就要減少做孖展，降低投資風險；第四，若係運用股神巴菲特投資方式嘅長線投資者，只需關注手中持股基本面有無轉壞，以及當初買股嘅理由仲存唔存在，若一切無變，則可繼續持有，甚至逢低加碼。

彩兒：你點訓練個人情緒智商（EQ）？

張：想訓練情緒智商一定要自己跌倒先識。投資係一門藝術，無法傳承，只能意會。就好似剛懂事嘅小朋友，無被火燙過，唔知道火爐嘅危險，父母點勸都唔及被燙嘅感受深刻。投資亦然，只有跌倒失敗，才了解到風險所在。即使睇書、聽人講，都未及自己經歷。

張：不過我都經常睇書，無論喺股市開盤交易時，股災時，或旅行亦然。因為對漲跌無咩感覺，亦唔會着眼一、兩天嘅漲跌。像今年二月美股道指挫逾1,000點，都係了解原因後繼續做自己嘢。當時好多人走嚟問點算好，咪一齊討論吓。

彩兒：你覺得環球股市最壞時間過咗未？

張：漲咗8至9年嘅股市總要休息，唔會咁快修正好，但我亦無市場講到咁悲觀，未來一段時間至一九年應該係劇烈震盪居多。

Kitty、彩兒