美國準備過一年一度的感恩節，美股休市。港股昨日悶足全日，主板成交從近日的7字頭進一步縮到落6字頭，得677億元。恒指除初段高開低走一段較急外，其餘時間猶如被點穴。
從恒指日線圖睇，近期低位已經唔再級級落，仲有近似收窄三角形等爆邊迹象。但要留意，今次市場炒G20的中美元首會面有好消息，即係話除非你係美國總統「侵侵」肚裏面條蟲，否則根本對會晤結果全無把握。
在此前設下，亦解釋了為何市場上大部分資金選擇先行撤退，轉為觀望，令港股成交日縮。
策略上，既然整體大市觀望氣氛濃厚，要買中個股難度極大，簡單睇番近期公布的一批業績股就好個別，好似莎莎國際（00178）周三中午公布中期業績，純利2.02億元，按年多賺84%並增加派息，刺激股價升到3.5元收市。
不過，集團主席就話對零售前景看得較淡，加上大行花旗削莎莎至「沽售」評級，目標價僅2.7元；高盛則認為莎莎的電子商貿及內地業務不明朗，維持「中性」評級，目標價由3.9元降至3.8元。既然個個都唔睇好，集團股價昨日即急瀉一成，早前升幅化為烏有，睇勢今轉反彈浪宣布玩完，隨時要延續今年六月至今的下跌浪。
反觀維他奶國際（00345），中期業績多賺30%至5.17億元，盈利增長理想，市場普遍睇好集團在內地業務發展迅速，事關期內收入增加33%，又食正中央主打消費降級這消費大浪，股價連升兩日，累升近兩成。
雖然維他奶短期累升已多，加上9日RSI高見74進入超買區，但既然有概念可炒，加上現時目標難尋，唔排除短線資金會再追多浸。已入貨者不妨貼市少少坐多陣；至於未入貨者，則應候低再考慮！
古勝