絲絲講場：英Sir逆市擴充教短炒心法
由基金經理黃國英（英Sir）主理嘅豐盛金融集團尋晚舉行周年晚宴，雖然今年港股表現差，但無損今年周年晚宴氣氛，筵開席數接近百圍，逾千名客戶和嘉賓參與。英Sir更頻被客戶捉住合照，仲要佢為新書《自己做Fund Man》簽名留念添！
減持倉 集中個股目標
英Sir全無受到市況差影響，表現High爆。佢話旗下基金客戶已增加到逾700個，其基金更準備下周三舉行擴充儀式。大家關心個市愈嚟愈難玩，英Sir就大派兇險市況下嘅投資貼士，指可因應市況，增加短炒、減少持倉數目、集中個股目標，可以突圍而出，話少理口水基金佬！
佢仲話，旗下基金價格舊年同今年嘅高低波幅達兩成，在其基金生涯中只發生兩至三次，但英Sir笑言，其實對比被動式基金如盈富基金（02800）回報仍遠遠跑贏，而其基金回報去年升逾五成，今年跌兩成幾，都仲贏緊兩成幾。
「打死唔信現金為王」
英Sir坦言，今次市場風險確實較高，雖然自己有信心，但市況係比較困難。但他認為，喺收水年代，唔代表要撤退，只係策略要改變。佢強調，「打死唔信現金為王」，因為好股票供應少所以捉得正表現仍可以好勁，而現時其基金持倉第一大股係亞馬遜，其次係新鴻基地產（00016），兩者持倉比例不超過10%。
余絲韻