Market Insight：吉汽可逢低博反彈

如果從恒指牛熊街貨重貨區睇，昨日開市大戶一舉殺晒25,000至25,499點共約19.2億份街貨，相當於3,735張期指合約，認真和味。再加上即市又再殺埋一批淡友，劏牛又殺熊，睇怕短期內都要「養肥」新一批牛熊先再落手。

基本因素未好轉

港股即市表演大拗腰，昨日一大批藍籌股亦乘勢反擊，好似友邦保險（01299）、中國平安保險（02318）、建設銀行（00939）、工商銀行（01398）及港交所（00388）全部都倒升，而吉利汽車（00175）更抽升4.7%。由於騰訊控股（00700）今日公布第三季業績，故資金未敢輕舉妄動。

講開吉汽，古勝唔睇好汽車股已有一段時間，一來板塊係中美貿易戰主戰場之一，二來見唔到中央短期內會推出刺激汽車行業的國策。反之，在中央持續加大開放外資持股比例下，未來本地品牌將面對重組及行業競爭加劇風險。

事實上，從數據去睇，都見到行業前景唔樂觀。中國乘聯會早前公布，十月內地汽車銷量按年下跌13.2%，雖然跌幅較預期為小，但全年銷量仍然不樂觀。至於吉汽，十月汽車銷量為12.89萬輛，按年增長約3%（九月按年增長14%），按月增長約4%，銷售增長放緩料難以避免，股價反覆向下正好反映數據表現。

不過，呢啲只不過係基本因素，從技術走勢睇，吉汽股價十月中跌到落13元邊明顯見承接，未來只要守住此位，短線逢低博反彈亦無不可，但就一定唔可以大貪，一見反彈到100天線約16.6元就要食胡，相反若失守前低位12.84元則嚴守止蝕。

防守股依然失色

中美貿易磋商似有轉機，昨日港股收市後道指期貨仍升逾百點。不過，早前講過公用股已大為失色，昨日一役亦明顯見到板塊唔買亦無損失。事關昨日早段大市跌近500點之際，中電控股（00002）、中華煤氣（00003）同港燈（02638）都唔見有資金大手追入，甚至以往攻守兼備的領展（00823）亦彈唔起。

睇番近幾個月，上述幾隻個股級級落，如果買落去並唔見得會贏，只係相對大市輸少啲。簡而言之，港股未來若現大跌，再買入防守股都只不過係輸少啲，但個市升時，資金博反彈又唔揀佢，變咗兩面不討好。所以再次提醒大家，如果港股後市又再大插，都係揸現金最穩陣！

古勝