Market Insight：中海油短線有追落後空間

從時序作分析，喺美國中期選舉後，聯儲局周五公布議息結果。雖然全世界都知會等到十二月先加息，不過事實係，美元暫時息率已高於傳統高息貨幣澳紐元，未來美國加唔加息已經唔係最重要，反而在中美貿易戰影響下，實體經濟承唔承受到加息速度比預期快的衝擊，對後市發展更為重要。

瑞聲睇埋業績再諗

睇番美股近兩日表現，似乎好番些少，但要留意的是，作為早前領跌大市的科技股根本未有好過。尤其是美國總統「侵侵」表明要調查Facebook、Google母公司及亞馬遜等公司有否壟斷，且蘋果公司上周公布業績後股價連插兩日，市場亦憂慮iPhone未來銷情，睇怕未來板塊壞消息隨時陸續有來，咁香港上市的科技股又點會唔前路茫茫。

講真，蘋果公司「頭暈」，兩隻飲蘋果奶水大的手機設備股自然都唔妥。舜宇光學（02382）及瑞聲科技（02018）昨日分別跌3.8%及3.4%，兩者皆跑輸大市，就算從估值睇，兩者往績市盈率分別為22倍及11倍，瑞聲睇落似幾吸引，但考慮到近期大行開始調低蘋果公司目標價，加上瑞聲周四公布第三季業績，如果屆時業績唔對路，相信大行隨時又踩多腳，似乎都係睇定啲先好！

相對上，騰訊（00700）都唔知係咪之前跌得太甘，昨日跌幅相對溫和，但要留意之前反彈係以上升裂口咁抽升，反彈得來比較虛，如果後市有乜風吹草動，嗰兩三個下跌裂口可以好快補番晒。

另外，大行繼續下調騰訊目標價，美銀美林就下調目標價至422元，維持「買入」評級，以反映一八至二○年收入預測下調2至5%的影響；麥格理則預期騰訊第三季高毛利業務增長放緩，故將其目標價下調至520元，評級則為「跑贏大市」。

油價年內易升難跌

策略上，集團基本面未見改善，以及整體氣氛一般，短期都係唔買得住。不過，就算唔買佢，投資者都可以將佢作為市場風向儀，事關大市夠唔夠力上，其實都仲係好睇佢！

至於其他重磅股普遍唔多夠力再上，但「三桶油」就除外，昨日升幅介乎1.8至2.8%，主因是美國已啟動對伊朗實施制裁，在全球石油供應未來轉趨緊張下，相信今年餘下時間油價都係易升難跌。睇番「三桶油」中，以中石油（00857）及中海油（00883）的上游業務佔比較大，對油價相對敏感，兩者中又以中海油近期股價起步較遲，可作為追落後之選，目標價睇前高位約15.7元，跌穿12.9元止蝕。

古勝