絲絲講場：馬斯克呻返工辛苦 老咗五歲
有鋼鐵俠之稱嘅國際電動汽車公司特斯拉（Tesla）舵手馬斯克好捱得，話自己每周會瘋狂工作120個鐘，一星期七日，日日如是，即係一日平均要做超過17個鐘，無日可以抖。為咗提高Model 3產量，以及為公司諗計發展，佢話呢一年過得特別辛苦，感覺上自己好似老咗五歲添。
一周做120個鐘人都癲
馬斯克接受科技網誌網站Recode訪問時就大呻，今年係佢成個職業生涯中最慘嘅一年！佢仲講：「如果每星期工作120個鐘，你可能會發癲！」為咗完成工作，鋼鐵俠每日淨係可以瞓幾個鐘，仲要喺辦公室瞓先至夠慳時間。
老細咁勤力，下屬點敢偷懶？馬斯克話，今年每位員工每周都工作100個鐘，即係一日超過14個鐘！一樣唔簡單！不過，隨住Model 3產量逐漸達到公司內部要求，佢哋依家已把員工每周工時降到80至90個小時，叫做輕鬆番啲啦！
余絲韻