絲絲講場：證監新主席有望加人工

啲市場人士成日話，做主席呢個位好大犧牲，一來袍金唔高，二來又唔可以做其他上市公司獨立非執董。咁又係喎，睇番前主席唐家成，自從一二年十月上任後，每年袍金都係101.2萬元，咁多年都冇加過。

莫講話證監會過去幾年有咁多嘢做，又打老虎、又打上市公司違規欺詐等，責任咁大，負擔咁重，竟然5年都唔加人工，連通脹都追唔上，計落唔啱數喎。

唔止主席，就連證監會非執行董事都係5年冇加過人工，都係每年25.3萬元。

非執董最少上調兩成

嘩，上述呢個數目，對比香港交易所（00388）班非執董，真係差一大截！所以絲絲聽到，政府將會檢討證監會非執董人工，加幅最少兩成。

睇番資料，原來上次證監會加人工，都係唐家成剛加入嗰年，由上年度嘅84.1萬元，加到101.2萬元，加幅都係20%。

講開港交所，今年度佢哋班非執董亦有得加人工，其中主席袍金由210萬元加到219萬元；非執董就由70萬元加至73萬元，仲未計向唔同董事委員會提供服務而獲取嘅酬金！

雖然證監會非執董今次加咗人工之後，同港交所都仲有好大段距離，但計絲絲話，總好過原地踏步啩！

余絲韻