孖妹S檔案：玩Game學炒技備戰驚嚇市

譚：證券分析員 譚朗蔚（Stevan）

沈：訊匯證券行政總裁 沈振盈（沈大師）

林：宏滙資產管理董事及投資策略總監 林嘉麒（KK）

袁：香港大學計量金融與經濟學四年級生 袁志樂（Dominic）

Sherry：香港大學統計及精算學四年級生 Sherry

彩兒：本報記者 彩兒

（就快入黑，六位參賽者着住萬聖節服裝潛入工廠大廈，有戴南瓜帽、披上白布、扮鬼魂嘅年輕人，揸魔鬼叉、戴帽扮女巫嘅大師，造型無得彈！）

考驗情商（EQ）遊戲 吹魔笛 從舊歌悟投資道理

遊戲規則：各位參賽者可自選演奏方式。分別係依照「大時代」曲目樂譜，用笛吹出靚音，或按照歌詞及旋律，唱出靚聲。喺咁陰沉嘅氣氛下，要嚟個演奏，少啲EQ都唔得！

彩兒：股民成日聽「摩笛」，皆因有影響力，今次就請六位一齊發功，吹奏電視劇「大時代」曲目，睇吓股壇會唔會大變天？

譚：嘩！年輕嘅我未聽過呢首歌！如此年代滿障礙，如此時候預計將來，驟眼望幾許悲幾許得失，逝去不再……（跟住歌詞試唱）

譚朗蔚攬住隻大蜘蛛扮結他，好快陶醉於美妙嘅樂曲中。林嘉麒手執魔鬼叉，手舞足蹈咁高歌。沈大師就先向難度挑戰，認真閱讀樂譜，練吹魔笛，都吹得好有味道。簡單練習完，就嚟個大合奏，大家都掌握到旋律，算過關啦！

Kitty：呢套電視劇以股市為背景，近排個市咁冧法，依家唱都好應景。

譚：雖然唱緊「大時代」嘅歌曲，但我哋都唱得好開心，做我哋呢一行，就係無論升跌市，都會一齊共度時光，唔同Key唔同聲，都可以一同和唱。

遇上跌市宜保留實力

沈：播「大時代」嗰陣，我已入咗行。當年呢套劇一出，股市就跌，跟住就流傳秋官效應。呢個現象教大家股市有升跌周期，物極必反，盛極必衰。所以投資者唔應該期望賺到盡，癲市時要識忍手，更重要嘅係喺市況回調時，保留到實力，再等大跌市時入市。

林：學識逆來順受，唔可以輸打贏要，唔信邪，相反如果輸錢，就要反省失敗嘅原因。播「大時代」時，我仲未入行，哈！哈！

Kitty：但港股跌咁多，對我哋呢啲入世未深嘅股友嚟講，已經係大時代格局啦！

沈：港股十月尾會喺24,000點附近結算，但預料年尾會繼續向下，尋找熊市一期A浪底部。至於十一月初則有可能會抽一抽高再下跌，大家要小心。

考驗智商（IQ）遊戲 有口難言 港股恐下試兩萬二

遊戲規則：六位參賽者分成兩隊，每隊派一位隊員做代表，負責將關鍵字形容畀同組嘅隊員知，若隊員猜中關鍵字就得分。限時三分鐘，估中最多詞彙嘅隊伍勝出。

沈：啲關鍵字全部都係金融詞彙，就等我嚟估啦。

喺比賽之中，沈大師表現較為突出，同林嘉麒合作無間，為組搶分，雖然最後比譚朗蔚嗰組落後一分，但佢哋都係差少少運氣啫。

彩兒：玩完遊戲，有口可言啦。梗係要問埋三位股評人對萬聖節後市嘅睇法。

沈：我估計港股會淡到年尾。企鵝仔騰訊控股（00700）起碼下跌至220蚊先識止步。

譚：我同意，港股嚟緊都係多驚嚇。而美股牛市已經完結，相信會有股災，所以港股都無可能獨善其身。

林：我都睇跌。投資者信心唔夠，而且市況未明，短期會有陷阱，例如廠商近月訂單仍然多，可能會誘導大家以為港股見底，但事實可能係廠商趕出貨，以避開關稅，明年隨時無單。所以，宜觀望明年初經濟狀況。

買公用股博長線向上

Kitty：呢個市況，有IQ、AQ定EQ先至會贏？

譚：阿Q精神。

沈：無信心就唔做，有信心先至做，輸少當贏。宜保守！

林：無錯！喺呢個市況，好多投資者都死得七七八八，但仲要保守。

譚：就算得番最後一滴血，都唔可以放棄。依家就算係黃金都無避險作用，因為全球收水，美國十年期債息升，令美債比黃金更吸引，所以資金會追捧美債，而唔係黃金。

依家唯一可以做嘅，都只係做淡，或者買公用股，望長線向上。預計年尾納指會跌至6,800點，而恒指亦會下試22,000點。

考驗逆商（AQ）遊戲 Laser射擊 如同炒股 做淡搵弱者

遊戲規則：分成兩組，限時十分鐘，追擊敵方組員，瞄準對方盔甲上嘅紅點發射，每射中一槍，得一分。累積最多分嘅隊伍勝出。

彩兒：股場十面埋伏，有時真係要落到場先知點玩，所以今次嘅Laser射擊比賽考驗大家應對逆境能力，等大師邊玩邊傳授秘訣畀學生。

Kitty：六位勇士揸住機關槍，血腥混戰即將上演。

沈：Wargame真好玩！鬥智鬥力。初初睇牌場，拍住兩位女士，以為會輸，點知就反敗為勝，所以話，只要有策略就可以贏。

譚：我哋兩局都因為太進取，專攻對方最強嘅人，即係沈大師，點知就成為輸家喇。炒股都係，喺逆市之中唔應該揀最強嗰隻去做淡，沽弱嘅較好。

彩兒：大師喺第一回合開咗900幾槍，但自己竟然一槍都無中。（後來發現佢件避彈衣上嘅紅外線感應器失靈。）

需清楚彈藥 了解心態

林：揀戰場好緊要，要清楚自己有幾多彈藥，同用咩心態出戰。我哋組今次係反例，不顧一切，唔理風險，只望做低大師一次，點知沈大師有不死之身。因此，要先保護自己，再作攻擊。

Kitty：股市就係估你唔到。

林：如果用太進取嘅心態入市，就要預咗輸。

譚：要學識按住自己兩點，即係注碼及收回價。

袁：玩Wargame同炒股類似，都要做好部署，衡量風險，計過數先入市。如果只有100萬元，但走去買一張大期，就好危險。

聽咗袁志樂分享，沈大師封佢為少年燈神。

袁：做咗燈神，我以後知自己買邊邊，反邊邊。

沈：你今次錯喇。我送畀你呢盞燈叫「蠱惑的燈」，所以唔係次次做相反嘅部署就贏梗，如果你今年同我做相反部署，就大件事。

Sherry：多謝大師引導同保護，我哋先可以取勝！

大學生靠程式交易搵食

Kitty：三位專家都覺得港股會續跌，少炒為妙。你又有何高見？

袁：股票真係難揀，所以我會專注做程式交易。我正考慮買商品期貨，因為有季節性，通常喺冬天十一至十二月，石油及天然氣價格就會升。另外，我亦會做套利交易，例如見黃豆及黃豆油嘅正相關性好高，若兩者價格走勢背馳，比如黃豆減產，令黃豆價格升；另一邊廂，黃豆油傾銷，令油價大跌，就可以做套戥。

睇位購入期權賺波幅

彩兒：喺呢個大跌市，多咗程式交易嘅好機會？

袁：其實咩市況都會有，但熊市通常波動大啲，因機構投資者做沽空多數涉及槓桿，一旦被斬倉，個市就會急跌。所以，我經常都會用Long Strangle（勒束式長倉期權策略），買認購及認沽期權賺歷史波幅，以及隱含波動率上升。另外，我發現最近A股太強，所以準備沽安碩A50（02823）期貨，同時買入恒生中國企業（02828）期貨。

Kitty、彩兒

若有料報畀彩兒同Kitty或有嘢問，可電郵money.biz@on.cc