Market Insight：科技股未屆撈底時

綜合而言，恒指十月雖然跌得好甘，但更嚴峻的是，美股跌浪似乎才剛剛開始，且美國十年期國債孳息率繼續落到去3.077厘，暗示市場避險需求有增無減，不利美股後市。

騰訊等再平啲先諗

另外，上周五港股ADR收市雖然大致平穩，但市場氣氛唔好就講乜都假，暫時都係多做功課少買貨，尤其是看官千萬不要因為睇見股價從高位累跌不少而買貨，事關跌市莫估底，如果心口掛住個勇字就衝入場，只會貪字得個貧！

睇番騰訊控股（00700）再跌3.3%報260元，底部何在冇得估。上周五股價受壓，主因有消息指旗下王牌手遊《王者榮耀》進行系統升級，由北京用戶開始，啟動全部用戶的強制公安實名驗證，未能通過驗證的帳號將會被禁止登錄。

講真，正如古勝早前所言，從政府角度，網遊高速發展至今，一場較大型的整頓是必要的，規範過後應有利產業長遠可持續發展，短期的陣痛，並不影響官方對創新科技產業發展的支持。

從估值睇，騰訊往績市盈率約27倍，唔算貴，但考慮到市場氣氛及美國科技股隨時有排跌等潛在利淡因素，現價估值又未算好吸引。走勢上，集團股價由年初高位476.6元跌至上周五低位見259.4元，累跌約45%。

年內單係一隻騰訊，已蒸發市值逾2萬億元，就咁睇數字確實驚人。由於下跌勢頭已成，要逆轉非短期內可做到，故策略上只宜作中長線部署：首先，暫時納入觀察名單內，但股價未曾由低位反彈一成以上前，可繼續放入「雪櫃」；其次，若符合到第一個條件，可再留意其市盈率是否已回落至20至25倍區域，之後才分注吸納，總知就唔使急！

舜宇面臨競爭加劇

除股王外，近期舜宇光學（02382）都跌得好慘烈，股價上周五再創52周新低，全日跌11.1%報64.4元。新近的下跌原因是，內地同業歐菲科技（002456.SZ）收購日本富士（Fujifilm）鏡頭專利後，將影響市場生態，意味着舜宇要面臨真正的競爭者，故市場迅即重新審視其估值，加上部分大行順勢加多腳，例如富瑞就將其目標價由169元大劈至65元，投資評級由「買入」下調至「持有」，難怪股價跌跌不休。

策略上，舜宇走勢級級落，就算投資技巧高超的散戶亦不應衝入去接「跌下來的刀」，好似上周五股價已經跌逾一成，咁真係唔知要中幾多次止蝕，先可以有利可圖。既然係咁，都係眼看手勿動！

古勝