內地電動車公司蔚來汽車（NIO）上個月先至喺美國上咗市，尋晚竟然又再上多一次？
望真啲，新上市呢間股價代號係NIU，係內地電動車品牌小牛電動營運商牛電科技。雖然都係造電動車，但係牛電科技啲車只有兩個轆，大家記住睇清楚，千祈咪搞錯呀！
兩家公司只差一個英文字母，投資者每日對住咁多隻股票，一時睇錯「誤將馮京當馬涼」都唔奇。就會好似舊年上市嘅社交平台Snapchat母企Snap Inc.（SNAP）申請上市後，同名嘅初創公司Snap Interactive Inc.（STVI）隨即被炒起，幾日內股價飆升咗倍幾。可能唔想令到股東混淆，Snap Interactive後尾轉行去做區塊鏈，順便改埋個名叫做PeerStream。
又好似另一個社交平台Twitter（TWTR）一三年申請上市，結果一字之差嘅電子產品零售商Tweeter Home Entertainment（TWTRQ）率先炒高幾倍。
蔚來汽車上市後股價曾經單日爆升逾七成，近期都算係焦點股，唔知嚟緊未來幾日兩隻嘅股價可否互相支持呢？
余絲韻