絲絲講場：港交所李國強功成身退？

絲絲聽聞，李國強夠退休年齡後，其實已延長咗服務合約一段時間，但最終真係退休，定係坐多一陣，真係要拭目以待！

期內完成多項大改革

李國強係港交所老臣子，亦係現時港交所少數嘅港人高層之一，佢做過多個部門，好似現貨市場、資訊技術、上市營運事務、結構性及定息產品等，差不多每個範疇都涉獵過，非常打得，舊年先升為聯席集團營運總裁。

佢依家係市場主管，角色好重要，事關港股每日交易都關佢事，而且過去幾次市場大改革，如收市競價時段、市調機制同實名制等，項目非常惹火，但佢都搞得掂，仲出咗名同香港證監會溝通得好好添！

至於另外兩名今年夠退休年齡嘅高層，即上市主管戴林瀚，同有「大內總管」之稱嘅公司秘書事務主管繆錦誠，就未聽聞會退休。除咗李國強外，絲絲亦聽到港交所有多名中層離職，好似前監管合規主管關蕙，佢現已加盟加密貨幣交易所Bitmax做營運總裁（COO）！

余絲韻