絲絲講場：70%父母想陪仔女逛玩具店
依家好多港孩靠「電子奶嘴」（即是手機、iPad呢類）長大，賣「真‧玩具」嘅玩具反斗城點仲生存到？嗱，佢哋大中華及東南亞地區首席商務官何楚嫣話做過調查，有70%亞洲消費者仲係鍾意行舖頭買玩具嘅，而且喺購買過程中，通常父母同小朋友一齊討論買定唔買，係一種有質素嘅家庭樂咁話！
反斗城內地擬年開30舖
佢又提到，佢哋亞太區業務近年每年都有雙位數增長，所以會繼續擴展，當中內地市場就計劃每年開多30至40間新舖，表明對前景好有信心。講到香港市場，佢話都好理想，但始終香港地方細，大量開舖就難啲喇。
對於美國玩具反斗城債權人取消破產拍賣，諗住重組業務，何楚嫣就話亞洲同美國業務完全冇關，所以唔評論咁多。補充番，玩具反斗城亞洲業務係由利豐（00494）母公司馮氏集團同美方合作經營，完全獨立於美方企業。
余絲韻