絲絲講場：銀行界「少林寺」教入行秘訣

有銀行界「少林寺」之稱嘅花旗銀行，培育過唔少金融精英，佢哋新上任嘅保險業務主管何文俊，同埋信用卡及無抵押信貸業務主管李冠康，就係當中嘅表表者，佢哋接受絲絲專訪，暢談大學生投身銀行界攻略。

花旗轉向非金融系招才

每年九至十月係大學生畢業後嘅求職旺季，同屬花旗管理培訓生（MT）出身嘅何文俊及李冠康指，該行現積極招聘MT，坦言修讀工商管理或金融相關學系畢業生唔一定有優勢；相反，隨住金融科技大勢所趨，花旗有意吸納其他學系嘅畢業生，包括工程學、社會科學以至語言學。

事實上，畢馬威舊年底發表報告亦話，金融科技今年會係銀行業發展嘅主流。李冠康坦言，十年前嘅學生擁有「銀行背景」當然會較有優勢，但由於客戶有不同層面嘅需求，銀行亦需要有不同專長嘅人才，甚至歡迎唔同國籍嘅畢業生加入，「相比起十幾年前，現時嘅門檻變得較低、入職道路變得更易」。

應徵者面試要放開自己

佢兩位都係於○六年加入花旗，打拚十二年，進身銀行部門主管。何文俊話，自己過去十二年曾擔任五個不同崗位，以及協助推出共10款產品，出任現職前係存款、證券外匯交易及孖展產品主管。佢加入花旗後曾到不同地區接受培訓，過程中認識到各地文化，有助佢建立清晰嘅職業生涯；而李冠康出任現職前係信用卡業務組合管理主管。

作為過來人，佢哋仲畀咗啲面試「貼士」予應徵者。由於期待應徵者將新生代嘅行為及消費模式帶到花旗，故面試過程唔再局限於商業個案，反而或會討論較大眾化嘅課題，例如「氣候暖化對社會有咩影響」咁。所以應徵者面試時要「放開自己」，基於本身嘅已有知識，向面試官展現出自己擁有適當好奇心及創新思維能力。

李冠康透露，該行過去每年聘請嘅MT人數均「不設限」，主要考慮應徵者嘅個人表現及思維，是否與公司理念切合。佢仲提醒畢業生，應考慮銀行嘅經營理念係咪與自己嘅長遠目標成就同興趣一致添。

余絲韻