絲絲講場：中銀一姐教用「轉數快」追女仔
金管局推出名為「轉數快」嘅跨行即時轉帳平台，估唔到中銀香港（02388）一姐龔楊恩慈（Ann）咁鬼馬，教人用「轉數快」追女仔！話說「轉數快」最大特色，就係輸入對方個電話號碼或電郵地址，就可以即時跨行過數畀對方，相當方便快捷，最啱同朋友食完飯埋單夾錢。
絲絲就睇住Ann向一位年輕男記者教路，可以主動話想轉帳畀心儀嘅女仔，咪可以趁機攞對方電話「抄牌」囉！絲絲覺得呢招都幾絕，不過若神女無心，唔該畀個Email就算，無謂畀假希望人啦！
原來要改變市民支付習慣都幾易，Visa最近一項調查就話，超過八成香港人認為只要有現金回贈或積分，就願意轉用手機或其他電子支付搭車畀錢。不過香港支付市場競爭咁激烈，其實個個都爭住「燒錢」搶生意，計絲絲話，一於係手機安裝晒所有支付App就包無蝕底！
余絲韻