絲絲講場:做Banker唔識科技唔掂

瑞銀尋日舉行創新科技高峰會,大談金融科技、醫療科技、區塊鏈、遊戲同數據係未來幾年最值得投資嘅創新科技。該行財富管理大中華區主席及主管盧彩雲(Amy)話,家陣要入金融業,真係要深入認識科技最新發展先得掂!

佢話,銀行開始Sell自己係科企,雖則家陣嚟瑞銀見工,仲未去到唔識寫程式、唔識分析大數據就「免問」嘅地步,但佢建議有志入金融圈搵食嘅男女老幼,要密切留意科技發展、清楚發生緊咩事,事關人工智能(AI)、虛擬實境(VR)、擴增實境(AR)、大數據、雲計算同5G呢啲技術,喺未來十年會顛覆好多行業,市場規模到二○二五年會由舊年得4,200億美元,膨脹到1.1萬億美元(約8.58萬億港元)!

科技會點改變世界?嗱,創新工場董事長李開復警告,AI威脅得最嚴重嘅就係新興國家,因為AI唔單止成本低過發展中國家「脫貧武器」——低廉勞動力,AI又唔使放假又唔會要求加人工,咁搞法邊個去新興國家開廠喎?

佢又話,新興國家依家要做嘅就係資助自己最叻嘅學生接受AI教育,建立本土AI企業。唔怪得知,絲絲喺網度見人瘋傳一本內地人工智能高中教科書啦!

瑞銀為客做埋AI媒人

講開又講,乜瑞銀依家業務多元化到做埋Speed Dating!講嘅係,佢哋會帶客戶見識AI同機械人嘅專家,等啲客知道科技發展到點,又等專家畀意見啲客可以點運用科技改進業務,同時「撮合」家族辦公室(大行為富豪家族度身訂造嘅全方位財富管理安排)同啲科技初創企業咁囉!

余絲韻