中美貿易戰有轉機，美國向中國提議展開新一輪談判，一反「侵侵」早前表示對華貿易戰上保持強硬的資態。恒指昨日裂口高開後反覆向上，並以全日高位27,014點收市，升669點，主板成交增至1,063億元。
港股突然抽升，可以從幾方面睇睇係堅定流。首先，從數據資料可見，最近升市而成交又過千億元的最近都要數到八月二十二日，可見確實有大戶用真金白銀落場。
再者，昨日板塊升勢幾全面，例如騰訊控股（00700）彈番4.9%收報323.8元，重上10天線322.1元，為八月尾以來首次；至於金融股亦升得唔錯，建設銀行（00939）升3.3%，工商銀行（01398）升2.8%，友邦保險（01299）升1.9%。
受惠於人民幣反彈，三大航空股無視油價上升因素，齊齊做好。內房股同樣有反彈，華潤置地（01109）、融創（01918）、碧桂園（02007）升幅介乎5至7.1%，仲有係連防守股如中電（00002）及中華煤氣（00003）等都升1至2.5%，此反映咗資金買貨時「攻守兼備」。
雖然今次升市係由消息帶動，但滬綜指昨日確有起色，全日升1.1%報2,686點，短期若能重上10天線約2,697點，料可進一步帶起港股氣氛。
部署方面，有一點要留意，就係上述觀點只可視為支持港股短期或進一步反彈的假設，要明白港股仍處熊市中，所以即使後市再升，亦只可視為反彈市，並非逆轉中期下跌勢頭。策略上，可作兩手準備，一是短期捕捉部分反彈潛力較大的個股短炒，如騰訊或「三桶油」，前者主要考慮到權重股關係，後者則博受惠油價中線具再上潛力。
其次係持重倉者，可趁今次反彈轉倉或減持，例如將手頭上較重倉的高估值股及弱勢股，轉至防守力較強的公用股或增持現金，不失為中線較可取策略。
古勝