絲絲講場:摩通CEO後悔柴特朗普台

摩根大通CEO戴蒙(Jamie Dimon)出名講嘢直接,佢周三早上喺公開場合霸氣話,如果自己參選,可以擊敗現任美國總統特朗普,又話自己有特朗普咁硬淨,但醒過佢!仲話唔怕特朗普郁佢,佢會還手!

但轉個頭戴蒙就後悔講大咗,中午即發聲明話:「我唔應該咁講。我亦唔會競選總統。咁亦證明我唔會係個優秀嘅政治家。我感到沮喪,因為我希望各方齊心協力解決重大問題。」

幾粒鐘戴蒙就耷晒頭,唔似佢喎,唔通擔憂向特朗普挑機有後果?其實佢「道歉」前,都有話特朗普「呢個有錢紐約人唔係靠父幹」。

侵侵反擊 指戴蒙唔掂兼冇膽

可惜特朗普唔收貨,出Tweet直踩戴蒙唔夠醒、公開講嘢又唔掂兼冇膽,未夠班競選總統!絲絲睇,摩通跟住有排滴汗。

余絲韻