絲絲講場：港電玩有「錢」途 年收益可達78億

睇番羅兵咸永道份報告，預計香港電玩業收入二一年有望達10億美元（約78億港元），PayPal香港、韓國及台灣總監葉承浩尋日話，咁計即年複合增長率達6.6%，會比香港經濟年增長嘅3至4%水平為高喎！

逾半女性日日打機

講番依家，PayPal最新調查顯示，港人平均每三個月花費851蚊喺打機上。最估唔到有53%嘅電玩女玩家每日都有打機習慣，比男玩家多10個百分點！

香港數碼港管理電競發展主管梁德明解釋，近年手機平台上推出唔少好似煮飯仔呢類「休閒類手遊」，又可以連結社交媒體Share戰績，吸引好多女玩家，似乎女性電玩潛在市場都幾大。係噃，借問聲，邊位可以畀條「命」絲絲打Candy Crush吖？

余絲韻