絲絲講場：雷添良掌證監焗斷六親？
香港證監會新主席人選已塵埃落定，雷添良將接替唐家成做下任主席。絲絲八到，雷添良最近就同身邊一啲老友食飯，飯局大概意思係佢接受新任命後，有段時間都唔可以再同飯腳、死黨等一齊，食埋餐飯後，就要同佢哋暫別一段時間。
咁又係，商界利益關係向來千絲萬縷，雷添良做得呢個位，都盡可能要避嫌，免瓜田李下，招人話柄！
袍金唔高 限制多多
但唔通做證監會主席就要斷六親？怪不得好多人都話做呢個位好大犧牲，一來袍金唔高，一向一年得嗰100萬元，又唔可以做其他上市公司獨立非執董，有乜事發生仲要出嚟頂，又要避嫌，真係多多限制！所以雷添良都算抵得諗，呢個位仲多數要做兩屆，即係六年咁多。
至於快將離任嘅唐家成就輕鬆得多，業界排隊歡送佢，聽聞佢個Diary差不多Full晒！香港金融服務界十一個組織聯同立法會議員張華峰將喺金鐘一間酒樓歡送佢，連當年有份帶頭反對證監會上市監管架構改革嘅上市公司商會都有份。
不過，地球係圓嘅，何況唐家成都就快退休，計絲絲話，一笑泯恩仇！
余絲韻