絲絲講場：碧桂園800億 搞機械人生意
內地房產發展商除咗主業外，好多都有搞吓同地產唔太相關嘅副業，好似早年恒大（03333）賣過礦泉水、前排又入股電動車咁，同埋萊蒙國際（03688）嚟香港收購幼稚園等。至於成日將「我是個農民工」掛口邊嘅碧桂園（02007）主席楊國強，原來除咗心繫農業外，亦有志發展機械人業務，仲話要開無人餐廳添！
碧桂園之前透露過要大搞機械人業務。點大搞法？五年內預算有至少800億元人民幣，不過其實公司一、兩個月物業銷售都係番度啦！
除咗配合人工智能、物聯網等技術，去研發圍繞主業房地產業務嘅機械人外，佢哋仲會喺主席家鄉順德起個「機械人谷」，日前就同當地政府舉行簽約儀式，整個項目面積達10平方公里，目標到二三年底引入過萬名全球頂尖專家同研究人員。
擬開千間無人餐廳賣順德菜
機械人除咗起樓仲有咩用？仲可以煮餸！楊主席話，計劃全球開設1,000間機械人餐廳，要做到真正由機械人迎賓、落單、煮食、上菜同清潔打掃嘅無人化體驗，仲要唔係普通快餐，而係真正嘅順德菜！
絲絲聽聞，喺碧桂園總部研發嘅機械人已經可以煮到廿四道順德菜，仲識自動波斟茶遞水添！不過唔知到時無人化嘅機械人餐廳，仲會唔會有客投訴服務態度？若有人食霸王餐又點呢可？
余絲韻