絲絲講場：三大發鈔行一姐比試理財心得

話說香港銀行公會最近聯同小童群益會推行「理財互動劇場2018」，到全港18間中小學校巡迴演出關於理財教育嘅話劇，推廣負責任嘅理財態度及行為。

啟動禮上，銀行界三大一姐當然即場顯示功架，向在座嘅小朋友傳授儲錢攻略。中銀香港（02388）副總裁龔楊恩慈（Ann）嘅慳錢大法竟然係「執屋」！絲絲當時聽到真係O晒嘴，到底搞邊科？

教小朋友消費習慣

原來係Ann嘅親身示範，佢話自己出社會工作後，發現Shopping買嘢真係好減壓，仲一個唔小心變成咗興趣添。直到屋企執屋時先發現，自己原來買咗好多化妝品同衫都冇用過冇着過，就放埋一邊好浪費，從此警醒自己以後唔好再亂買嘢，結果年中真係慳到唔少錢。

銀行公會主席兼滙豐香港區行政總裁施穎茵（Diana）就話，當年細個同外婆住時養成咗「應使則使」嘅消費習慣，細細個已經儲到第一桶金。嘩，絲絲真係好想知桶金有幾多！

至於渣打香港區行政總裁禤惠儀（Mary）就建議小朋友，要學識分辨「需要」同「想要」，先要清楚了解自己真正需要先好購物。

絲絲見到呢三位女Banker咁落力教小朋友理財，都唔知應該邊個算係贏出呢場比試嘞，一於學獎門人話齋──打和！

余絲韻