絲絲講場：難捱中環貴租 監管機構焗搬走
踏入九月份，市場除咗非常關心邊個會做香港證監會下任主席之外，該會辦公室喺二○二○年約滿後會否搬離中環，亦係市場話題之一。
證監：最緊要地方啱
日前證監主席唐家成話，已委託顧問研究有關辦公室安排，佢個人認為最重要係搵到適合嘅地方，唔排除會遷離中環咁話！
證監會大本營長期都喺中環，如果真係搬出，會有乜境況呢？哈哈，遠離「金魚缸」集中地，第日會否收唔到咁多風或冇咁貼市，咁班蠱惑仔咪好開心？絲絲講笑啫，唔通離開中環就唔查案咩！
但有口痕友就話，好似近期內地「假疫苗」風波，吉林長春長生生物科技（長生生物）嘅股民，齊齊喺北京嘅中國證監會總部抗議痛哭，又話要盡快復牌、又話要追討損失咁。而本港證監會當年亦因雷曼迷債事件遇過唔少示威，所以口痕友話搬遠啲亦有好處，好似去黃竹坑或九龍東等。
其實睇番其他金融監管、諮詢或半官方機構，近年都已陸續搬離中環及金鐘核心地帶。好似保險業監管局，舊年十二月搬咗去黃竹坑香葉道，租用5萬平方呎。主席鄭慕智曾話，有啲地區租金太貴，實在不能長期落腳，黃竹坑都好方便啫！
至於強制性公積金計劃管理局（積金局）早喺二○一六年初，已將其本來位於九龍環球貿易廣場嘅總辦事處，與本來喺葵芳新都會廣場及中環盈置大廈嘅辦事處，陸續搬去葵涌九龍貿易中心。
仲有香港金融發展局（金發局）同金融糾紛調解中心亦都各自搬咗去灣仔陽光中心，依家兩個機構做埋鄰居。
金管擁國金物業唔使煩
不過金融管理局就肯定會繼續留守中環「最高點」，事關佢哋○一年買入國金二期55、56、77至88樓自用，唔需要受租約困擾。不過，金管局亦都好均真，就算係「親生仔」按揭證券公司租用80樓，都要交市值租金，結果按證二○○四年都頂唔住租金開支，最後要將辦公室搬去上環中遠大廈。
余絲韻