Market Insight：港股後市未許樂觀

老實講，今次都真係幾大煲，因為新興市場危機一旦爆發，後果有幾嚴重真係不堪想像。正當大家仍關注阿根廷及土耳危機時，那邊廂的南非及印尼又出事，前者第二季經濟增長意外收縮0.7%，與預期增長0.6%相差甚遠，南非蘭特即時大跌；至於印尼，該國貨幣亦跌至九七年亞洲金融風暴以來新低。

新興市場再爆危機

十年前金融海嘯時，美國靠大印銀紙將通脹輸出至新興國家，惟收水後如今再進入加息周期，新興市場資產價格唔再漲之餘，仲要面對每隔三個月左右加息一次的「壓力測試」，咁你話資金點會唔從新興市場流番入美元資產？

簡單睇，美匯指數早前回軟唔太耐，近日又重新轉強並彈上95.5水平，而資金持續流入美元資產之勢頭會唔會延續至十一月中期大選前後，對港股後市有頗大啟示作用，值得大家深入研究。

港股跌到無眼睇，權重股當然大大鑊！騰訊（00700）跌4%，拖低恒指105點！至於滙豐控股（00005）及友邦保險（01299）分別跌1.4%及3.2%。猶記得市場早前仲講緊兩股有望受惠加息周期，惟港股市底弱過藥煲，投資者對任何利好消息毫無反應，咁差的氛圍，這亦是港股後市有潛力再跌的主要因素！

市底差，就連防守力最強的公用股都守唔住，中電控股（00002）、中華煤氣（00003）及港燈（02638）昨日跌幅介乎1至2.5%，另攻守兼備的領展（00823）亦跌3.1%，可見今次資金沽貨意欲甚強。再睇昨日港股收市後，歐股初段又浸浸落，美股期貨都係跌，後市真係唔多樂觀。

唔做唔錯 保留實力

雖然跌市仍有逆市奇葩，昨日資金就追入部分細價股，品質國際（00243）、區塊鏈集團（00364）、大成糖業（03889）即市都曾抽升，不過唔係無成交就係午後升幅回順，日線圖多為倒轉錘頭，咁炒法都係一兩日貨者居多，衝入去其實同賭大細無分別，都係算吧啦！

市場消息指，騰訊有份投資的美團點評（03690）將於本周五起公開招股，咁半新股現況又如何呢？睇番幾隻半新股焦點如歌禮製藥（01672）、中國鐵塔（00788）以及小米集團（01810）昨日走勢，只有歌禮受惠於醫藥板塊氣氛回暖有得升，惟歌禮之前累跌唔少，現時都只係反彈，故半新股同樣唔掂得。

睇落個市乜股都唔買得，看官又有乜好做？計古勝話，在如此市況下，doing nothing is doing something，留得青山在，哪怕沒柴燒！

古勝