絲絲講場：中裕CEO勤視察 呻難放長假
中裕燃氣（03633）今年成為股價52周新高榜「常客」，行政總裁呂小強（Daniel）身家肯定水漲船高啦。不過佢話公司依家處於高增長期，可能好多事發生，「總級」人物成日喺Office隨時畀人話工作「唔到位」，包括佢在內要成日去視察項目先得，因此一兩年內睇怕好難攞到長假放鬆吓嘞。
其實要緊張嘅點止咁少吖。中裕維持今年賣16億立方米天然氣、接駁80萬住宅用戶嘅目標，但接駁客量條數點計，嚟緊兩年實無今年咁勁。
搵併購 發展分布式能源
佢話，工商業用戶增長未必會慢，已接駁用戶亦會不斷用氣，但內地燃氣市場已經畀人攞得七七八八，搵併購一定唔可以停，同時要發展分布式能源，出年年頭會有個工業園區嘅試點項目出到嚟，下半年再有明確嘅發展計劃。
中裕管道天然氣銷售毛利率上半年亦都跌咗，其中住宅用戶要「蝕住賣」。Daniel話，下半年天然氣成本會否升得好多要睇中石油（00857），但中裕會轉嫁畀工商業用戶，務求銷售價差維持穩定，又相信住宅用戶天然氣下半年唔使再蝕住賣。
講開又講，家陣香港人喺內地仲吃唔吃香呢？Daniel話內地尤其係大灣區仲有好多機遇，唔可以話香港人會無碇企咁話。
余絲韻