絲絲講場：貝索斯身家曾破萬三億

讚自己洗碗Sexy

呢樣咁重要嘅必做嘢，就係喺屋企每食完晚飯，佢一定親自落手洗碗！佢話自己洗碗最Sexy。呢位54歲大叔洗碗點性感法？各位自己想像。

至於呢位全球首富平日點過？貝索斯唔Like鬧鐘，每日瞓足8粒鐘自然醒，然後同佢位小說家太太食早餐。早餐佢至愛八爪魚，話愈唔知係乜嘅嘢愈想食。每朝佢都留番同太太及四個仔女一齊過，所以早上公司開會？No Way！

佢唔Buy開會呢套，連亞馬遜嘅投資者，一年加加埋埋都只係見得6粒鐘。佢仲有個「兩個Pizza原則」，即是開會者，唔超過可以用兩個Pizza招呼得到嘅人數。佢亦知自己做老細火爆，聽講特別請人訓練自己平復情緒。

佢喺亞馬遜作風節儉，員工想好似其他科企咁有免費午餐或按摩？Forget It！佢話公司樓下大把流動小食車。

市值曾突破1萬億美元

至於貝索斯有錢成點？佢係全球首富之餘，仲遠遠拋離第二位、身家978億美元嘅微軟創辦人蓋茨。貝索斯揸住佢創辦嘅亞馬遜16%股權，公司股價一路係咁升，佢身家自然水漲船高。

雖然亞馬遜周二收市升幅收窄，報2,039.51美元，市值仍然高達9,947.53億美元。亞馬遜股價周三早段雖然回吐2.26%至1,993.45美元，但單係今年以來，股價就急升咗逾七成，市值進帳4,300億美元，呢條數已幾乎係三家傳統零售商沃爾瑪、Costco同Target嘅市值總和。

亞馬遜年內股價升勢凌厲，只不過用咗三個月市值就由8,000億美元升上1萬億美元，反觀Apple就用咗足足15個月。

其實，亞馬遜亦都曾經歷蝕錢嘅日子，不過，喺貝索斯英明嘅帶領下，亞馬遜業務持續擴張，由書籍擴展到音樂同電影，之後又涉足玩具同電子產品。

貝索斯嘅高瞻遠矚，從佢○六年推出雲端業務AWS可見一斑，該業務去年帶來超過170億美元收入，已成為亞馬遜最大盈利增長引擎。

揸股廿年升值近千四倍

好多人都估唔到亞馬遜股價會咁勁，九七年亞馬遜上市時市值不足5億美元，假如有投資者咁好眼光當年投資咗1,000美元，呢筆資金今日經股份分拆調整後已經升值至近140萬美元。

至於公司市值幾時可以重上萬億以上？富貴如浮雲，貝索斯瞓足8粒鐘自然醒又係第二日！

余絲韻