Market Insight：方向未明 以靜制動

如果從資金流向方面睇，港股中線前景都唔太樂觀。金管局八月份已斥資逾300億元買入港元，有分析指銀行體系總結餘可能最早於本月底跌破500億元，這或引發對融資成本急劇上升的擔憂。另外，若美國本月如期加息，屆時資金流出香港勢頭將加劇，同樣不利港股前景，所以即使見恒指昨日反彈，但如果看官手頭上無心水股，都係一動不如一靜！

博反彈切忌大貪

恒指回升，股王騰訊（00700）亦終止四連跌，升1.7%報338.6元，並貢獻恒指44點。可能因為官媒指其實是遊戲產業產生了「負外部性」問題，需要多管齊下消除產業的負面影響，這論點令到部分投資者覺得，政府今次針對的乃「防止青少年沉迷，而非網遊」，故見昨日騰訊反彈動力較強。

然而，要留意股王至今仍在下降通道內，故有意博反彈者，都要睇實上方近365元之食胡位；相反，一旦失守近期低位328.6元應即時止蝕。

人民幣中間價昨日大幅反彈，三隻中資航空股東方航空（00670）、南方航空（01055）及中國國航（00753）升幅介乎0.9至1.6%不等。不過，都係嗰句，人仔中線都係貶值居多，加上伊朗、委內瑞拉及利比亞等均面臨着不同程度的原油生產不確定性，估計國際油價年內仍有上升空間，凡此種種皆對航空股不利，建議眼看手勿動。

早前提到，如果以為順勢跟風炒就冇問題，咁就真係太天真太傻。大家睇睇日前提到的光伏股，昨日已經變咗「中伏股」，周一升逾四成的卡姆丹克（00712），昨日跌13.3%，陽光能源（00757）亦跌11.8%。

軍工板塊跟唔過

此外，內地軍工股突然被資金追捧，連帶在港上市的軍工股都跟升，其中以中國航空工業（00232）升三成最威水；至於中船防務（00317）及中航科工（02357）就只係升得2.7%及2.6%。要留意，軍工股昨日動力主要源自A股內的板塊，考慮到行業基本面未有大變，加上睇見光伏股炒咗一日便打回原形，試問仲點敢追！

古勝