絲絲講場：Apple庫克慳家到你唔信
蘋果公司（Apple Inc.）成為首間市值破萬億美元上市公司，行政總裁庫克（Tim Cook）絕對勞苦功高，佢個人身家超過6.25億美元，即是近49億港元，但就慳家到你估唔到。
庫克手持約6.22億美元嘅Apple股票與股權，加埋佢作為Nike董事所得嘅340萬美元股權，呢兩筆加埋已經6.25億美元，仲未計佢私人產業、個人投資同現金，身家肯定唔止呢個數。
呢位講過「錢唔係我嘅動力」嘅57歲富豪，除咗喺一四年宣布出櫃外，一向為人低調，無結婚亦無兒女，聽講仲係獨居嘅添，好多人都非常好奇佢嘅私人生活。
內衣褲等大減價先買
至少大家會知嘅係，庫克生活仍然好樸素。佢所住嘅美國加州帕洛阿爾托（Palo Alto）間2,400呎屋僅190萬美元，即是港紙千五萬唔到，以該區房價中位數330萬美元計，佢住嘅絕對平民過平民！講到精打細算，佢就連內衣褲，都係趁百貨公司Nordstrom半年一次大減價先買。
佢生活亦好簡單，大部分時間喺公司做嘢，聽講佢每朝凌晨3點45分瞓醒，閱讀同覆電郵。佢至愛Keep Fit，每朝5點都會去Gym，但為保私隱就唔會去Apple個Gym。佢亦愛踩單車同遠足，時常去當地嘅Yosemite國家公園。
雖然佢經常坐Apple架私人飛機周圍飛，但十之其九都係出差，好少出國放假，除咗兩年前帶埋當時11歲嘅姪仔去紐約，仲去紐約交易所遊咗轉。
庫克無兒無女，但就超錫呢個姪仔，一早講明除咗留番姪仔讀大學使費外，計劃自己去世時將所有錢捐畀慈善機構，造福社會。佢仲講過「想成為池塘中嘅鵝卵石，為變化創造漣漪」，庫克帶領蘋果市值破萬億美元，無疑係蘋果嘅「鵝卵石」！
余絲韻