Market Insight：內銀股宜趁高減磅

自人行宣布重啟「逆周期因子」後，人民幣彈咗一轉，並推動港股反彈，但其實除咗周一大升近600點外，近期資金只不過係短炒早前被洗倉的板塊，例如部分教育、醫藥、內房及中資航空股等，同樣彈過一輪後動力已有所放緩。

航空股唔買無損失

若再睇埋指標股騰訊控股（00700）、港交所（00388）及中資金融股近期亦有不俗勢頭，但未來能否更上一層樓，對港股後市到底係重返「彈散」格局抑或整固再上，更具啟示作用！古勝已講過中資航空股彈力有限，南方航空（01055）周二收市後公布中期業績唔靚仔，昨日即瀉4.6%，連帶東航（00670）及中國國航（00753）的股價都要跟跌1.7%及1.6%，板塊又變得無氣無力。

其實航空股今轉回升，主因是人仔匯價反彈，但從南航今年上半年收入按年升11.6%至675.2億元人仔，但盈利卻倒跌24.4%至20.95億元人仔可見，人民幣貶值對行業影響力有幾大。既然基本面變差，股價彈完再散都好合理。

雖然摩根士丹利績後發表報告，指南航年內累跌約31%，相信股價已反映高油價和人幣貶值因素，預期第三季盈利有改善，故給予其目標價7.9元，投資評級為「增持」。雖然唔係個個睇跌，但用真金白銀落場先至係反映市場睇法，三大航空股重新回軟，反正見唔到有利股價的誘因出現，短期唔買其實都無損失。

部分內銀股公布業績後股價回落，建設銀行（00939）雖然中期多賺約6%至1,470.2億元人仔，符合預期，可惜資產質素存在隱憂，逾期、關注及不良貸款皆見增長，顯示在人仔貶值下，企業賺錢能力下降並間接削弱還款能力。未來內銀基本面有進一步惡化機會，昨日建行僅跌0.2%都算係咁。

企業盈利前景轉差

至於中國銀行（03988），公布上半年多賺5.2%，惟不良貸款餘額按季增加36.57億元人民幣，不良貸款率持平於1.43%，股價昨日亦跌0.5%。

綜合而言，內地債、股以及匯市料持續波動，人幣貶值潮隨時重臨，企業盈利前景不明朗，整體經濟自然難以樂觀。作為百業之母的內銀，能逆市突圍的機會不大，故未來若股價進一步做好，已持重貨者應趁高減磅甚至清倉，事關縱使在熊市中都會有反彈時，而市場上亦沒有幾多人能夠準確捕捉高沽低揸時機！

古勝