絲絲講場：老翻股神呃Like勁過巴菲特

引用投資金句獲瘋傳

大家都知股神少用電腦，用Twitter更加唔會好似美國總統特朗普咁活躍。但近期有個「老翻」股神Twitter帳戶好受歡迎，仲標榜要教大家人生同投資哲理，鼓勵大家進步之餘，亦會引用正貨股神嘅投資金句添，如「在別人貪婪時恐懼，在別人恐懼時貪婪。」

呢個帳戶名係Warren Buffet@warrenbuffet99，姓氏較正版嘅少咗一個「t」。戶口喺一六年十二月已經啟用，但真係受人注意嘅係今月廿五日一段貼文，提到「給年輕人嘅建議」，包括要量入為出、多啲閱讀同寫作。貼文已被分享11.8萬次。

社交網站帳戶突被封

到上個禮拜日，一段寫道「追尋夢想、成為導師、記住別人名字」嘅貼文更已被分享超過22.7萬次。今個禮拜二，新一段貼文提到點樣避免浪費時間，同摒棄「永遠做唔到」嘅負面思想。

查實呢個假股神突然爆紅嘅原因，原來係美國歌手Kanye West截圖分享咗其貼文，搞到佢2,810萬個Twitter追隨者粉絲都見到呢個假股神帳戶，大家都好驚訝點解啲人知道假都繼續關注。

到禮拜二為止，warrenbuffet99帳戶有超過24.2萬個追隨者關注，熱潮一時無兩，但帳戶喺禮拜三突然被停用，原來係被Twitter以濫發訊息為由被Suspend！之不過，咁咪正好印證股神名言：「潮退之後，就知邊個喺度裸泳。」

至於有認證嘅真股神巴菲特Twitter帳戶，雖然有143萬個追隨者，但一三年四月到依家只有9則貼文，最後一則喺一六年四月貼出，睇嚟股神對Twitter唔太有興趣喎。

余絲韻