Market Insight：中資航空股彈力有限

從基本面分析，人仔匯價受中美貿易戰影響而持續貶值，惟匯價反覆向下，對內地經濟同企業的負面影響陸續浮現並且加劇。人民銀行上周再度啟動「逆周期因子」，令人仔急速反彈。不過，此勢頭可以維持幾耐，咁就真係冇得估。然而，股票市場既然藉此機會炒上，亦無謂與大市鬥氣，有興趣入場唔係問題，最重要係見到有乜風吹草動，要識得落車！

中海可小注追落後

早前因人仔貶值而急跌的中資航空股及內房股，今期就抽升得最勁。咁又難怪，內房債重、航空股則外債多，兩個板塊受惠人仔反彈而回揚實在合情合理。三大航空股昨升幅介乎1至3%，內房股就彈得仲勁，富力地產（02777）大升12.8%，融創中國（01918）升6.6%，雅居樂集團（03383）升5.1%，萬科企業（02202）升4.1%，大大隻的中國海外發展（00688）亦升3.6%，板塊升勢全面。

睇番升得最勁的富力，今年上半年盈利按年增63.28%至39.23億元人仔，派發中期息每股0.4元人仔。截至六月底，集團現金結餘359億元人仔，並持有未提取信貸額度1,369億元人仔，在佳績加上財政狀況唔錯下，成為今轉帶起板塊的主力。

走勢上，該股昨日一支大陽燭抽穿六月尾至今阻力16元，但17.5元水平為今年二至六月大型橫行區底部支持，短期要一舉上破難度極大，故短線再升空間其實有限。

反而中海的上升速度相對來得較慢，但已重上50天線，集團具龍頭優勢，若內房板塊氣氛持續，此股應該仲有水位，值得小注追落後，目標睇28元，止蝕位24.6元。

等埋業績始作部署

至於中資航空股，撇除人仔匯價外，仲要考慮多一個油價因素。觀乎近期國際油價回揚，紐約期油已重上68美元樓上，後市一旦上破70美元，隨時又拖一拖航空股後腿，所以如果要從上述兩個板塊中揀一個來博反彈，似乎內房股比較值博。

另外，今個星期多隻內銀股公布業績，今日就有建設銀行（00939）、農業銀行（01288）及中國銀行（03988）排隊出場公布業績，周四則輪到工商銀行（01398）。四大國有內銀股價昨日跟隨大市上升1.6至2.8%不等，惟在中美貿戰加上人仔貶值影響企業盈利的預期下，估計內銀壞帳上升機會唔細，所以即使有意買貨，亦唔爭在等多兩日，睇埋業績先再部署。

古勝