絲絲講場：僱主查信貸紀錄請人增兩倍

港人履歷失實情況冠亞洲

信貸資料機構環聯表示，港人遞交履歷表失實情況達18%，分別高於新加坡及內地約1及10.5個百分點，係全亞洲情況最嚴重嘅地方！

至於求職者履歷表最常見誤報，係在職及在學日期，其次係職銜。平均每12個抽樣調查，就會有1個求職者誤報日期。點解會錯？可能係求職者想掩飾空白期，所以先延長在學及在職時間喎。

部分本港求職者誤報的資料

履歷誤差率呈上升趨勢

另一方面，去年要求查閱求職者信貸報告嘅僱主數目，較○八年升咗近兩倍。環聯解釋話，僱主要求翻查求職者嘅信貸報告，主要都係想了解吓應徵者財政狀況，包括還款情況、借貸紀錄，甚至破產紀錄等。

以行業計的話，銀行業、證券業、IT外判商、藥業、高消費品零售業、清潔及速遞公司等，就最常要求查閱求職者信貸報告。因為呢啲行業嘅從業員，大多需要接觸大量客戶個人資料及敏感資料，甚至需要與直接接觸客戶嘅財產。

不過計絲絲話，大家最緊要都係準時還卡數、唔好過度借貸，再加上定期檢視信貸紀錄同一份「誠實」嘅履歷表，咁就撈邊行都無有怕啦！

余絲韻