絲絲講場：代理行「假一賠百」搵真盤源

物業代理利嘉閣地產早排先推出業界首個「真盤源」計劃，佢哋位總裁廖偉強（Willy）又同絲絲講，尋日再推出一個內部審查計劃，實行「假一賠百」。

Willy話，現時旗下所有放盤都要「真實委託」、「真實在售」、「真實價格」同「真實圖片」，但都擔心有前線員工唔小心犯錯，所以希望透過新制度，履行專業地產代理嘅責任，而計劃暫時做到本月底。

佢補充，若員工發現有違反「四大承諾」嘅放盤廣告，只需拍下有關照片，指出錯誤，電郵至內部審查部門，如屬實同事可以獲得100元作回報，當然該員工個人資料會絕對保密，而犯錯同事就要更正放盤資料，並接受再教育。

早前有指各大地產代理及搵樓網站嘅逾16萬個放盤，但大部分係俗稱「一盤多出」或「影子盤」，相信只有約1萬個先係真實。雖然係自己人篤自己人，但對樓市嘅發展都係好嘅！

余絲韻