絲絲講場：庫克收獎賞9億唔及雷軍一成

小米上市前 雷軍獲99億

只要Apple股價冇乜依郁，今晚美股收市後，庫克除可袋走繼續擔任舵手嘅28萬股Apple股份外，仲可以拎埋額外28萬股與表現掛鈎嘅股票獎賞，共值約1.2億美元（約9.36億港元）。不過比起小米上市前畀雷軍嗰筆以股份為基礎嘅99億元人民幣獎勵，庫克唔夠雷軍一成！

講番庫克呢筆與表現掛鈎嘅股票獎賞，派發準則係，只要公司股價喺之前三年回報跑贏最少三分之二標指成分股，庫克就可以捧走上述最高「派彩」，而自一五年八月廿日至本周二收市止，Apple股價回報達119%，跑贏超過80%標指成分股。計埋今次，庫克將連續第五次捧走最高「派彩」。

至於小米自七月初上市以來，股價大上大落，尋日收報17.44元，僅略高於17元嘅招股價。不過，雷軍嗰筆天價獎賞係唔使睇股價表現嘅，唔知小米股東又點睇呢？

講番庫克，佢一五年話過計劃將大部分身家捐出去，本周二呈報監管機構嘅資料就顯示佢捐咗2.32萬股Apple股票。講到善心，庫克贏晒！

余絲韻